U rejim d’Al Asad marfatle afqide d’Rami Maxluf

U rejim d’Suriya marfele ba casrowat fqide dıkfılhiwo ba şırkat d’morıd da şuğlone rabe Rami Maxluf dkıtyo u abro du holo du rişqutno Başar Al Asad.

 Camgabıd da falohe d’Syriatel u di knuşto noşoyto d’Albustan, marfeste ba casrowat d’rabhaylawotho dkıtwın masre cam Maxluf.

 A şutose di mşaynutho du rejim d’Suriya marfelın ba casrowat dıfqide dıkfılhiwo ba şırkat d’morıd da şuğlone rabe Rami Maxluf dmahıtwo şişaltho dı tedbire mqabıl dide ba kımo yarhe dşaficina.

Lfuth i mşatasto d’Suriya da zedqe noşoye, u rejim du rişqutno Başar Al Asad marfele afalohe kulle dıkfılhiwo ba şutose d’Maxluf, baynothaye 41 falohe bi şırke d’Syriatel, 57 falohe bi knuşto noşoyto d’Albustan dkımrayşanla Maxluf u 58 ma rabayhaylawotho u folhe du rejim dkıtwolın methcadronutho cama grube mzayne dkıtwın masre cam Maxluf.

U kriz bayn d’Maxluf dcımre 51 ışne u abro di camtho Başar Al Asad mşarewole bu qayto dşaficina bu zabno dıtlıbwole me Al Asad dmakle i dhılmiye dıkmisomo cala şırkatayde dıtlıbwo menaye dobanwo madatho li şultonutho du rejim.

Maxluf ba maqırhınwotho dıfrıswole bi dafayde du nawlo, thımwole ahaylawotho di mşaynutho d’Suriya bu msoko da falohayde, bnişo dıtorın aşırkatayde dilonoyith i şırke d’Syriatel dkıtwola 70% mu sahmo da zuze di şuqo da talafone u da nesore b’Suriya.

İ şultonutho du rejim ba fusqone dmıdwola ba yarhe dşaficina, mawdacwola dmahıtla ido cala zuze d’Maxluf, di bethzawgayde u da şorikayde, u thimiwo kulle dqayıthlın zuze b’darbone lo qonunoye mu zabno dımşarele u qrobo d’Suriya i şato da 2011 u huli harayto di şato dşaficina.