U rişono di qelayto di tagorutho d’Sweda thımle i şultonutho d’Suriya dkımşawşo u ray gawonoyo cal dkımdacyo dhiyayo dıkmafito a’mcadrınwotho

SWEDA, Suriya — U rişono di qelayto di tagorutho udu snoco di hiğmonutho d’Sweda Nabih Bakri, bi maqırhonutho dhule l’Hawar News mawdacle di mditho d’Sweda wa qıryawotho d’hedora b’aykanoyutho d’haşo rabo ne, ukito ste ambargo aclaye u mırle “a’mcadrınwotho noşoye dmacıbri li hiğmonutho d’Sweda ba yawme dşaficina mşadri m’tukose dkıtne masre cam Emwotho Mhaydotho. I şultonutho d’Suriya ksaymo propaganda da dugle, ukımdacyo dhiyayo dmafıtla a’mcadrınwothani l’Sweda. Wu medano kulonoyith latyo triso”. 

Bebzabno, Bakri mawdacle da mcadrınwotho emwothoye dmacbıri l’Sweda ğalabe ışmone, ulıkşowın lu darğo du ambargo ula casqıwotho dıkcayşolın i hiğmonutho m’zabno dıkmo şabe. Callathe, Bakri mzaharle m’kriz noşoyo rabo dkibe dhowe b’Sweda in dothe dımdawım u tecmiso di cayno, u in dothe ste dlımiqadım snodo çıddi la comure di fnitho. 

Camgabıdathe, Bakri mşalatle bahro cala gunhe ucala dyoşe dıkmisomi bhaq da mdinoye d’Sweda, u grışle ste u zuhoro cala gunhe du qatlo udu nhoro dkımdawmi cala mdinoye d’Sweda ma grube mzayne, u mırle “u mede dıkmisım nxiluthoyo bhaq da n’abne d’ha athro”. 

Bu huthomo di maqırhonuthayde, Bakri mırle “an’abne d’Sweda lıgıdtocın u mede dhawi bhaq dıththe, ulıgıdşıbqi a’dyoşani dıkmisomi. Ucıl mathe kım’akdina d’Sweda lıgıdfayşo kafınto, ugıdımdawmo dfayşo thabıtto bu sebyono du camaydan udu kenşayda u gawoyo”.