U tukoso d’İAEA makadle du İran maklele a buhone dıksoyım bıtre macımle

U tukoso Emwothoyo da buhone dcala zayne nukleer, mawdacle u ğamo dıktocın calu du İran lıkobele aftho hani arbco yarhe, dcobır lıtre ma macımlayde du snoco du nukleer. U tukoso d’İAEA makadle, du İran maklele a buhone dıksoyım bıtre macımle, dıkmisım taxmin dıkmitıstacmıliwo heş meqım mu qyomo du nukleer da 2015.

The International Atomic Energy Agency (IAEA), awkith u tukoso Emwothoyo du energi udu atom, dkıtyo u qentrunayde b’Vienna d’Austuria, frısle taşroro calu ğamo dıktocın, cal di şultonutho d’Tehran lıkturyo hani 4 yarhe da mbahnonayde dcubri l’2 ma macımle nukleer du İran.

A 2 macımlaniste kmıtyaqın u tukoso Emwothoyo, dkıtwın hfite heş meqım mu qyomo dımdewo beyn du İran uda 6 hayle rabe, bi sbutho di tahrazto nukleer du İran ba 2015. Bu qyomano maşewo fulhone, leşan u İran dılo sonıc zayne nukleer.

Lfuth u tukoso Emwothoyo dgıforıs b’falge du yarhano taşroro, a 2 macımlani heş ma 2003 kmitıstacmıli leşan u snoco du uranium u calathe, kıtocın ğamo rabo cal dlıkmitahwele aftho dcobır la macımlani wu Tehranste lıkımfanyo a şwole dkıtte bi sbuthathe da fulhone da 2 macımlani.

Bı taşroro hreno dfrıswole u tukosano bu yarho dı şafıcina mawdacwole, du İran kıtle kmoyutho d’uranium dkıtyo 8 naqlat, zıttır mu mede dhowe ele fsoso, lfuth u qyomo da 2015. Awkith bi şatathe da 2020, snıcle u İran hol 550 kilogram d’uranium.

Bu qyomanoste maqbewole u İran, dobo aftho la mbahnone d’İAEA dsaymi buhone ba macımlayde. Elo bıthır mıd Amerika grişowa mu qyomano udı bdewola dmazido a tedbirayda calu İran, Tehranste mfanewola dgımazido u snocayda du uranium.