U Yawnan kobıc dmisım hboso cal Turkiya laşan dmeydo a galwoye dkıtne bu athreyda

İ şultonutho d’Athena, kubco du Huyodo d’Urifi dsoyım hboso cal Turkiya, leşan Ankara dmaydo a galwoye dkıtne ba maşıryotho du Yawnan.

 Mawdıc du Yawnan mşadarle egartho lu Huyodo d’Urifi u tlıble mene, dmafıt u qyomo da 2016 la haye, bnişo dımakıd d’Turkiya dmadcıro hol 1.500 galwoye dırfid u talab di galwoyuthathe bu Yawnan.

U waziro di galwoyutho du Yawnan Notis Mitarachi mawdacle, di şultonutho d’Athena mqadamla egartho d’talab lu Komisyon d’Urifi, li rişonutho du Huyodo d’Urifi u lu şutoso da hayle d’Frontex dıksaymi u duyoqo da thume, leşan dsaymi hboso cal Turkiya.

U waziro Yawnoyo makadle, bi egarthathe tlib me Urifi dsaymo hboso cali şultonutho d’Ankara leşan dmaydo 1.500 galwoye dkıtne ucdo bu Yawnan u dlayt ucdo amro Emwothoyo dmisım u sutorathe awkith dıklozım dmitadcıri la dukothathe.

Bu qyomo dımdewo beyn du Huyodo d’Urifi u d’Turkiya ba 2016, kıtwo fusqono dmitanqıs u mınyono da galwoye dkubci dımdawmi lan athrawotho d’Urifi u d’Ankaraste klozım dmaydo a galwoye dlatwo amro Emwothoyo dmisım u sutorathe. Bi şato d’şafıcina, mıdwola Turkiya belhude 139 galwoye.

Leşan u qyomano dfoyıt la haye, fsıqwola Urifi dobo ba milyare euro l’Turkiya xıd snodo. Elo Ankara dıksaymo baytoyutho l’3.6 milyone galwoye d’Suriya, thımla Urifi dlkımtabqo sahma du qyomano u ğalabe naqlat gzımwola u Huyodo dgıfutho a tarcayda la galwoye leşan dızın l’Urifi dhuwla hol 6 milyare euro l’Turkiya leşan i sbuthathe da galwoye.

U waziro Yawnonoyo mırle; Urifi klozım dımşaklo mekanizma leşan dımsafyo u şwolano bu taro du qyomo dsımwo bnişo dmiamın u dcoro mşayno da galwoyani. Turkiyaste klozım dımazido a fulhonayda bi sbuthathe du qyomo u dmaklıyo a sfinotho dıknufqi me Turkiya u dıkmotın la thumaydan u d’Urifi.