U Yawnan krıhle u fusqono d’Turkiya dmıftıh falqo mi mditho d’Maraş d’Qufrus

İ şultonutho du Yawnan krıhla u fusqono d’Turkiya dmıftıh falqo mi mditho d’Maraş dkıtyo bi gozarto d’Qufrus.

Mexasra hreto, Turkiya mawdacla dmabdela tedbiqat folhoyo hatho bu madınho du yamo Mescoyo.

U rişwazire du Yawnan Kiryakos Mitsotakis, bi maqırhonutho dhule li sfaryawmo Franşoyto, mawdacle dıkrofıd u fusqono d’Turkiya bi sbutho du ftoho di mditho d’Maraş dıknuflo calu sforyamo du yamo Mescoyo. Mitsotakis makadle du rşomo da thume du yamo kımathlo i sbutho rişoyto du Yawnan ba bazarayda cam Ankara.

Bebzabno, Mitsotakis mawdacle dkito b’qamuthe d’Turkiya 2 darbone, ya u dialog lfuth u qonuno Emwothoyo yaste a tedbire dgıdmitahti acla. Meqım mathe ba mowat mtagılyone Yawnoye b’Qufrus, mahwewolın hfuxyo mqabıl du fusqono dmıdle u falqo du garbiyo d’Qufrus dkıtyo masro b’Turkiya bi sbutho dmıftıh falqo mi mditho d’Maraş dkıtyo xlitho ma comurayda mu zabno du kboşo d’Turkiya ban 1974.

Megabo hreno, Turkiya mawdacla adyawma dmabdela tedbiqat folhoyo hatho bu madınho du yamo Mescoyo. Lfuth a tebe dıfrisi u tedbiqat hatho kmisım bu yamo d’Ege u meqım kımo yawme cayni tedbiqat folhoyo sımwole u Yawnan bu madınho du yamo Mescoyo beyn 6 uhol 8 bu yarhano. U rişono da hayle di naşfe d’Fransa rabhaylawotho Terry Berkardste bi maqırhonutho dhule mawdacle, du athrayde hadiroyo dnofıq mqabıl dıqrobe dkibe dhowın şahine, u grışle u zuhoro cal hın athrawotho dkıbci dmazidi u qento da qrobe.

Berkard mırle; Gıdhowe şuhlofe hathe bı britho, u layto qento dkımhadıd a thume d’Fransa, elo hın athrawotho bu hırhoşo dıksaymi kıbci dmazidi u qento dhowe qrobo. İ maqırhonuthathe d’Berkard simo bıthır mıd qaşyo i mwatyutho beyn Fransa u Turkiya, mi celtho da fulhone lo qonunoye dıksaymo Ankara bu madınho du yamo Mescoyo.