Viyana gsaymo baytoyutho li Gala da 21 eşne du froshezwo d’Suroyo TV

VIYANA — Eşqad mtaybwo 2 Galat la 20 eşne du froshezwo d’Suroyotv-15 bu yarho d’Ilül, simo’wa i qadmayto b’Midyad wi trayonitho’ste, simowa 5 bu yarho d’Teşrin u qamoyo bi mdito d’Giessen d’Almanya. Wu ucdo’ste mqarawle u lalyo, di Gala da 21 eşne du froshezwo d’Suroyotv dgımisomo ramhıl bu athro d’Austoria.

A Galat du froshezwathxu, munasabat ulsoye’ne dıkmhaydi u camaydan u kmıxlıq mkono dımcaydina a eşne dhawile Suroyotv bu froso da tahrazyothayde ubı sabro dımdawım eşne yarixe u frosayde u camhıdode, dımhalqina dawse lu teqwiyo ulu şuşoto du camaydan, di marduthayde udu tbocofrosayde.

Lfuth i mawdconutho dmatilan mi sictho mtaybonitho di Galathe, a hedriyat kulle kamili wu kınutro u yawmano dothe u dmımle u salon di cito d’Mor Afrem b’Viyana. İ Gala d’adşato gıdmşaryo bi şoctho da 20.30 dcasriye b’froso hayo cama zamore du lalyo dkıtne Sargon Sharro, Paul Ayar u Andreh Sukkar.

Bi tahrazto catırto du lalyano kito mamle frişe, myaqronwotho u maqıblonwotho dgımisomi cama hadire. Bebzabno, kito’ste u groşo du lotteri di Gala di şatathe wu qtoco di duktho da 21 eşne d’Suroyotv.