Von Der Leyen u Friedrich Merz: zodeq teqwiyo du haylo du Huyodo d’Urifi laşan sistem tibeloyo hatho

AXEN, Almanya – I rişonitho du komisyon d’Urifi Ursola Von Der Leyen bu mamlo dsımla athmıl bi mditho d’Axen b’Almanya, sımla qroyto dmişatıs şıkıl hatho du şlomo Urifoyo bu doro da 21, şıkıl dkımbaynole udıkmadrole Urifi b’qarcıd d’ruha. 

Von Der Leyen mırla ste “sistem tibeloyo hatho gıdnofıq li holo b‘gawıd da 10 ışnani dıbqamuthayna. Ida dlıkıbcina dmaqıblina u tathir dgıdhowele u sistemano cal Urifi ucal britho, klozım inaqlayo dhowelan sahmo bu şekolayde. Klozım d’Urifi dhuyo qıtca şritho şariroyith bu taro da şuhlofe şerşoye dkowın bıbritho”. 

Bebzabno, Von Der Leyen grışla u zuhoro cala n‘athrawotho hadome du Huyodo d’Urifi dıkrımşi ucdo, laşan dımbayni ba mowat milyare Euro xıd buçça lu snoco du zayno, uba melani mdawamla “a’zabne kmişahılfi u Urifi ste kmişahılfo acmaye. Ahna ksaymina u medano wa fulhonani kulle laşan dımdafcina u şlomo. U makthabzabno lıgıdşobıq u keşlo wi mşawhıronutho, ahna i wolithaydan dhuyo Urifi qıtca şritho”. 

M’gabo hreno, u rişwazire d’Almanya Friedrich Merz bu mamlo dsımle athmıl bi mditho d’Axen, makadle du athrayde b’fusqono kamiloyo dhuyo Urifi qıtca qwitho u mhayadto, u mırle “ahna lıgıdfayşina noytral inaqla di sbutho dhuyo masırto camu nfoqo du moro li hirutho, li demoqratoyutho, li morutho du qonuno ulu neshono du barnoşo bi qıtca d’Urifi”. 

Mertz mırle ste “i wolithaydan i makthabzabnoyto dıtorina Urifi dhuyo qwitho l’darğo dkiban dnıfqina moro lu şlomo b’gawıd di qıtcaydan, udım’amnina i hirutho l’zabno yarixo. Almanya bu haylo dkıtla hadırtoyo dımdawmo l’qudmo bi wolithathe bi sdirutho da şorikayda an’Urifoye”.