YPG maglela cali hiyoyutho da Sohde dmahrawla Turkiya wa marhıbonayda a bethqburathe b’Cafrin

Bi maqırhonutho dıfrıslın a Haylawotho du sutoro du Camo-YPG, maglelın cali hiyoyutho da Sohde dmahrawla Turkiya wa marhıbonayda a bethqburathe bi mdito d’Afrin.

İ maqırhonuthathe di YPG friso, bıthır mıd a hayle kaboşe d’Turkiya thımwolın a hayle d’QASAD bu hawbo du qtolcamo b’Afrin.

U qentrun du tbocofroso da Haylawotho du sutoro du Camo-YPG frısle maqırhonutho u maglele cali hiyoyutho da Mharbone di YPG, di YPJ uda Haylawotho d’Suriya Demoqratoyto d’matınwo lu darğo di Sohdutho bu zabno dkbışwola Turkiya i mdito d’Afrin meqım 3 eşne.

A bethqbure da Sohde hfiriwo mahrıwiwo me Turkiya uma marhıbonayda d’Afrin 14 u 15 bu yarhano uba tebe dfrıswolın lu tbocofroso, mdacewolın da hayle d’QASAD sımwolın qtolcamo b’Afrin. ba bethqburani kıtwo garme d’71 Mharbone u mdinoye dhowlın ağono mqabıl du kboşano d’Turkiya cali mdito.

Bi maqırhonuthathe i YPG kımmo; U tehriwano da bethqbure da Sohdaydan, mqabıl dkull prensib, tawditho u timoyotho di noşutho’yo u ahna kım’akdina, dlıgfayşina şalye mqabıl da gunhe uda dyoşani dıkmisomi calu camaydan ucala Sohdaydan. Turkiya mahrawla ğalabe qabre da Sohdaydan wu tehriwano, hawbo rabo’yo.

İ YPG mırla’ste; Ahna kıtlan haymonutho da came di Gozarto udu garbyo udu madınho d’Suriya uda came dbritho kulle, gıdnufqi mqabıl da fulhone lo noşoye dıksaymo Turkiya u ahna’ste, hadirena dobina funoyo la gunhani u kıtulbina ma hayle Emwothoye, dsaymi hboso cal Turkiya ucala marhıbonayda d’nufqi me Suriya.