100 hadome du Mawtbo d’Amerika sıme qreyto l’Biden dsonıd an Armınoye

100 hadome du Mawtbo tahtoyo d’Amerika, sımlın qroyto li şultonutho d’Joe Biden d’sundo an Armınoye wu qlimo d’Nagorno Qarabax.

 Bi egartho mşawtafto dımqadmo li şultonutho Amerikoyto, rizi 7 talabe leşan u snodo d’Qarabax u tlib mu rişono Biden, dmawde bu qtolğenso dan 1915.

Bi egarthathe dmıdyo me 100 hadome du Mawtbo tahtoyo d’Amerika dkıtne me 20 marcıyotho frişe du athro, mqadmo li şultonutho ula şutose frişe di wazirutho di baroyutho d’Amerika. Bi egarthathe sim qroyto li şultonutho d’Biden, dımhalqo dawsat qrihe lu texliso du qlimo d’Nagorno Qarabax u leşan i mşaynutho d’Armenia.

Bi egarthathe’ste, krih u cnufyo, a hawbe wa hçome folhoye dsimi b’zabno 6 şabe me Azerbaijan wu muttafikayda Turkiya calu husrono dtrelın cala dukotho da mdinoye bu qlimo d’Qarabax, tlib mi şultonutho dmahto i sbuthathe bi tahraztayda di baroyutho u dobo funoyo la 2 athrawotho.

Mşalonitho du Komisyon Athronoyo dan Armınoye b’Amerika Tereza Yerimyan  mahkela cali ulsoyutho di egarthathe u mırla; İ mıştawtıfonutho celoyto u qwitho dhawyo li egarthathe dımqadmi li şultonutho du rişono Joe Biden, kıtlan sabro d’xulqo zmomo u dhuwyo mawthronitho l’Qarabax u dmitarkıw şlomo aminoyo bu qlimo u b’Armenia.

Bi egarthathe’ste a 100 hadome du Mawtbo tahtoyo rızlın 7 talabe, u hın menaye; Amerika dımşadro mcadronutho msarhabto lu camo d’Qarabax, bnişo dqodır dımhathıth a dukothayde. Amerika dmawdıyo bu zedqo du camo d’Qarabax dımdabır ruhe. Dmitarfın a yasire Armınoye kulle. Amerika dmahto tedbire cala rişone d’Azerbaijan u Turkiya. Ubi nuqzo da 7’ste, tlib mi şultonutho d’Joe
Biden dmawdıyo bu qtolğenso dsımla i mamlaxtho da Cuthmanoye calan Armınoye ban 1915.