15 eşne di yasifutho: Yusuf Turker u igantho di dayro d’Mor Hobel u Mor Abrohom bi Midyad
Bı dafo qlimoyto di mdito d’Mıdyad b’Turabdin, frısla mimartho cali dayro d’Mor Hobel u Mor Abrohom u frışla dilonoyith duktho, li gantho dbınyo qariwo li dayro. Bi mimarthathe mahke cal Yusuf Turker dkıtyo mu Mawtbo da Citotho b’Mıdyad wu tacbo dkobe, leşan i ganthathe dhuwyo duktho du ltomo udi nihutho leşan u camaydan b’Turabdin.
MIDYAD, Tur Abdin — U gelyunoro di dafo qlimoyto d’Sizin-Medya, frısle mimarthathe u mahıtle i rişithayda; Ha hulmo, ha gabro u gantho mzayanto ba warde u habobe-i teşcitho dcal Yusuf Turker b’Mıdyad. U gelyunoro laqi Yusuf Turker dkıtyo mu Mawtbo da Citotho b’Mıdyad bi gantho dkıtyo qarıwto li dayro du camaydan-Mor Hobel u Mor Abrohom.
Bi mimarthathe mahke calu nişo dkıtle Turker cali ganthathe dkobıc dım’athlo i mdinoyutho du camaydan u dhuwyo duktho di şawtofutho leşan i noşutho kula. Bi ganthathe dkiba warde, habobe u dawme u ilone frişe, duktho’yo leşan u barnoşo dqodır dmıthnıh eba’yo elo camathe’ste, duktho du tolerans da mardwotho’yo.
Bi mimarthathe mahke aydarbo Turker hani 15 eşne kıfolıh leşan i ganthathe dhuwyo remzo di ahonutho, du huyodo uda haye mşawtıfe beyn da came frişe di duktho. İ ganthathe bebzabno bethcatiqotho’yo dkibe mluwe u syome di ido dsimi me material catiqo wa socure dkıtne b’cımre frişe’ste kmıfsohi lu mede dıkhozın eba u kımafiti u zabnathe.