250 milyare dolare gniwi mi butja du Iraq

Mi celtho du fasad da rişone folitiqoye, zıd me 250 milyare dolare mvayci ma butjat dımbayniwole u Iraq bıthır mi şato da 2003.

 Megabo hreno, u qoyumo catiqo bu parlamento du Iraq Josef Sliwa thımle u rişono d’Zawco Yonadam Kanna dhani 30 ışne dıkmoyıd duktho bu maşıqlo folitiqoyo calu hşowo da zedqe du camaydan wu dactidhayde bu Iraq.

 Bayn d’zıd me trilyon dolar dkıtyo u timo da butjat dımbaynile u Iraq mi şato da 2003, kito zıd me 250 milyare mvaycene bi netije du fasad da şultınwotho.

U waziro du momuno du Iraq Cali Callawi bu mamlo dsımle bıha turgomo momunoyo, mawdacle da 250 milyare dolare dkıtne mvayce mıstacımli lu yuthrono dhın hayle Iraqoye, u bi netije du medano u haylo di şultonutho mazcafle. Callawi mırleste “azuzani dmanıhbi kmakfın lu bnoyo d’menyono dathrawotho”.

U yadıcthono bu haqlo du momuno Manar Alcubaydi bi maqırhonutho dhule li dafo d’Alhura, mawdacle da zuze dımvayci ma butjat du Iraq zıd mu mede dmaglele acleyo u waziro du momuno, u mırle “azuzani dlatlın ruşmoyutho awkith dkıtne mvayce, kmotın l’bayn 400 u hul 450 milyare dolare, awkith kımathli hedor 40% mu timo da butjat du Iraq bıthır mi şato da 2003 wu falqo rabo da zuzani mvayıc bayn di şato da 2008 u huli şato da 2014”.

Nuri Almaliki dkıtyo u notarrozo gawonoyo du gabo Maşılmono d’Aldacwa da Şica, mıdwole i wolitho d’rişwazire du Iraq mi şato da 2006 u huli şato da 2014 awkith azuze di butja du Iraq mvayci bu zabno di rişonuthayde li şultonutho d’Boğdod.

Megabo hreno, u qoyumo catiqo bu parlamento du Iraq Josef Sliwa sımle hjomo qaşyo calu rişono d’Zawco Yonadam Kanna dkıtyo bebzabno u rişono du koalisyon d’Alrafidayn bu parlamento d’Boğdod. Sliwa bi maqırhonutho dıfrısle bi dafayde du Facebook mawdacle d’Kanna hani 30 ışne dıkmoyıd duktho bu maşıqlo folitiqoyo lımakşarle dımmathıl u camo Kaldoyo-Suryoyo-Othuroyo, u ba melani mdawamle “Kanna bu zabno dıksoyım sturyo i aykanoyutho haruto da qalilwotho du Iraq lıkşowe dmıjğıl xıd mathlono du camaydan u Kaldoyo-Suryoyo-Othuroyo. Kanna mi şato da 1991 laşan dmitahwewole i duktho dkobacwo bu maşıqlo folitiqoyo du qlimo d’Kurdistan, naqla kımyadwo u gabo Demoqratoyo d’Kurdistan u naqlaste kımyadwo u gabo du Huyodo Athronoyo d’Kurdistan wu medano ksamwole calu hşowo da zedqe du camaydan. Ubıthır ma 2003 u hul ucdo b’cayni şıkıl kımqadım li şultonutho d’Boğdod. İda dkit farsufo dıktocın i mşalutho dlawile u camaydan mede b’gawıd du Iraq Yonadam Kannayo dıflıhle qulnaqla mqabıl du camaydan laşan dfoyış huwe bi duktho dkobıc”.

U folitiqoyo du camaydan Josef Sliwa bi maqırhonutho dıfrısle mawdacleste du rişono d’Zawco ba 30 ışne dşaficina maşfarle ham i surto di şultonutho Kurdoyto dholumto dkımdabro ahiğmınwotho du garbiyo du Iraq u hamıste i surto di şultonutho qentrunoyto dholumto d’Boğdod, u bu mamlayde l’Kanna hawxa mırle “lımahtıt i mşalutho bıqdolıd da hrene. Aduglaydox lıkşıfci fayış calu camaydan wu qedomaydox dyılfatle ma remze diktator lıgıdfoyıt hawxa bıfşitutho”.