32 alfo Euro lkul galwoyo dikdocir mu Swed

STOCKHOLM – U rişwazire du Swed Olf Kristersen mawdacle dkıtlın tahrazto dmazidi i mcadronutho momunoyto dıkqathleyo u galwoyo dkobıc dıdocır bu sebyonayde lu athrayde. 

Meqım mathe, kul galwoyo dıktorewo u Swed bu sebyonayde kıqathwole 9 alfo Euro xıd mcadronutho momunoyto, elo u rişwazire du Swed mawdacle dkıbci dmazidi i mcadronuthathe l’32 alfo Euro, dilonoyith bıthır mıdlımakşarla i tahrazto dımbaynowa meqım. 

U komisyon da sebwotho da galwoye du Swed, grışle u zuhoro cal 70 galwoye dmıstafadwolın mi mcadronuthathe bi şato da 2023, elo baynothaye ha dırfidowayle. 

Laşan dmişaçci a’galwoye dnıfqi mu Swed, i şultonutho d’Stockholm fsıqla dmazido i mcadronutho dıkmitahwiyo lu galwoyo l’tloth naqlat u falge. Wu rişwazire du Swed mawdacle dmıstafadlın mu nesyuno dhawile u athro du Danmark bi sbuthathe. 

Bebzabno, u rişwazire Kristersen mawdacle dkito balki ğalabe bnaynoşo dlıkımaydi u renyano, elo mawdacle ste dıkmıtyaqın da galwoye dlaybın dhowın falqo mu kenşo Swedoyo, kibe u insiyativano dıtorelın dmıftakri dıdıcri la n’athrawothaththe. 

İ siyasathe i hatho du Swed kmıntır dfayto la haye bu şuroyo du yarho d’Konun u Haroyo di şato da 2026.