69 qoyume urifoye bi egartho dıkthulın kmawdıci dmitakliyo Turkiya ba hjome dıkseymo
Qoyume mu parlemento d’Urifi mzaharlın Turkiye bi egartho dımşadrolın lu mşalo da esoroye baroye du huyodo d’Urifi Josep Borell dkıtyo ba esore cam Turkiya. İ egarthathe dımşadro me 69 qoyume ktılbi mu mşalo da esore dsoyım hboso cal Turkiya calu tworo da qonune dıksaymo.
Bi egartho dımşadrowelın a 69 qoyume du parlemento d’Urifi dkıtne me gabe u gurube mşahılfe dkıtne bu huyodo Urifi tlıblın mu mşalo da esore baroye Josep Borel dsoyım hboso cal Turkiya metul dkito lo qonunoyotho ğalabe dkowın bu zabnano du gabo di AKP.
Bi egarthathe a qoyume rızlın a nuqtotho dıkhozın d’Turkiya ktawro a zedqe noşoye wa qonune di noşutho. Bi egarthathe a qoyume kımi: u msoko da qoyume u da sanode du gabo demoqaratoyo da Came HDP latyo mede dkibe mitaqbıl. U dyoşo dıkmisım cala gabe saqıbloye gawonoyith, wa kboşe dıksaymo calu garbyo du Iraq u calu garbyo u madınho d’Suriya,
Bi egarthathe a qoyume kımi: u sistem di rişonutho dkito b’Turkiya manqasle i şaryutho di kinutho dkito bu athro, u hjomo di şıltonutho dlatyo b’kinutho latyo belhude mqabıl da qoyume, elo mqabıl da karxwotho dkıtne b’İdothe du gabo di HDP ne, bi sbuthathe kmaydi arişaykarxwotho u kmahti a hiğmune b’dukthaye,
Ma ğuboye dhawınwo 31 bu yarho d’Oder di şato da 2019 zıttır me 65 rişone da karxwotho di HDP midi mi wolithathe.
A qoyume gurşi u zuhoro cala hjome dıksaymo calu garbyo du Iraq u kımmi ba hjomani a mdinoye khozın husrono mawxa ktocnina ğamo rabo.
Bu huthomo di egartho da qoyume ktılbi mu mşalo da esore baroye du huyodo d’Urifi Josep Borell dmahto klayto qumi şıltonutho qşitho d’Erdoğan dkıtyo azolo li diktatoriye.