Waziro Macruf yatuw cama nahire du cameydan b’Arbil

U waziro da sebwotho da came qalile di şultonutho du qlimo d’Kurdistan Aydın Macruf, yatuw cam menyono ma rişone da şutose marduthoye du camaydan u Kaldoyo-Suryoyo-Othuroyo du Iraq.

 Bi ytawtathe, atre gabe makadlın dıklozım dmitaqre u makthabzabno da came qalile du qlimo ba kıthowe da şbile da madraşyotho.

 U waziro da sebwotho da came qalile di şultonutho du qlimo d’Kurdistan Aydın Macruf, athmıl hawile knuşyo camu rişono di knuşto d’Hadyab Habib Hanna ucamu rişono du huyodo da sefre u kothube Suryoye Rawand Bulıs. Bu knuşyano drişi afulhone dıksaymolın i şultonutho d’Arbil laşan dmitahıt u makthabzabno da came qalile b’gawıd da şbile da madraşyotho du qlimo.

Rawand Bulıs bu mamlo dsımle, mawdacle dıklozım camgabıd du makthabzabno da Kurdoye, dmitaqreste u makthabzabno da came qalile du qlimo d’Kurdistan ba kıthowe da şbile da madraşyotho mşahılfe şarwoye u mescoye u cleytır, elo bşart du makthabzabno dkul camo dıkhoye bu qlimo dmıkthuw karyoyith m’yadıcthone dilonoye du camano u b’şarirutho lfuth a’yulfone betaysawboye.

U rişono du huyodo da sefre u kothube Suryoye bi maqırhonutho dhule li dafo d’Ankawa, mawdacle du waziro Macruf makadle bu knuşyano di şultonutho d’Arbil kımqadmo b’şıkıl msimono li tarmithathe, u mahwele sabro du medano dmaqwe icyeşe wi mşaynutho gawoyto bayn da came mşahılfe du qlimo d’Kurdistan.

Bebzabno, Rawand Bulıs mawdacle dıgriş bu knuşyano u zuhoro cala mkone dmıftıh ferco du leşono Suryoyo bi hiğmonutho d’Nuhadra.

Camgabıdathe, u waziro Macruf mawdacle dıklozım a’şutose u tukose mdinoye u marduthoye da came du qlimo dımşatsi sictho celayto druhaye, bnişo dmitaqwe u dawro dıkmıştacın b’gawıd du kenşo.

Meqım mathe, u waziro da sebwotho da came qalile di şultonutho du qlimo d’Kurdistan Aydın Macruf, laqiwo menyono d’qoyume mu camaydan cam mşale u malfone du yulfono Suryoyo, bnişo dmıdroşo i tarmitho di kthawto du makthabzabno da came du qlimo.