Donald Trump u Xi Jingpin laqin hidode b’Beijing

BEIJING — Awıl naqla bıthır 10 eşne, kıloqe u rişono d’Amerika Trump u bar’amnayde Xi b’socurutho dsimole li arişkoyto du Sin Bejing. Bu zabno dmıstaqbele u rişono du Sin Trump mırlele; Klozım ahna dhowinawo muttafik ulo saqıbloye dhıdode. Bıthır mtayıb zawho rabo u ruşmoyo bu Salon rabo du Camo b’Bejing u drelın şlomo, la fqide dhıdode dkıtwın hadire.

Bıthır mu zawhano dsim l’Trump, kınutri 2 yawme d’droşe diplomatiqoye udi tagorutho beynothaye u kmıntır dmıkle cal şwole yaqure u acmaye i sbutho du teknoloji, di tagorutho wu qetro d’Taiwan. Bu zabno di socuruthathe’ste lo kmıntır dmimıd fusqone elo u qedomo du Sin, kibe dımbayın aydarbo gıdmdawmi a esorathe bu dactith.

Bu mamlo dhawi beynothaye’ste Trump mhanele a esore towe dkito beynothaye u dhuwe farsufoyith, kıtle iqoro rabo l’Xi ulu Sin. İ taşdarto dkıtyo acmi’ste kıtla sabro dhowe droşe mawthrone bu haqlo di tagorutho. İ ytawtathe beyn Xi u Trump dımdawamla bıthır 2 şoce, sxırto’wa lu tbocofroso. Bebzabno mawdıc, d’driş bi ytawtathe a hzayotho dkito calu Madınho Mescoyo, calu qrobo d’Ukraina udi gzırto d’Qore.

Elo leşan u Sin, u şwolo d’Taiwan ulsoyo’yo ubi sbuthathe, kibe dhowe saqıbloyutho jıddi du renyo beyn da 2 rişone. İ şultonutho d’Trump, maqbewola paketa folhoyto d’11 milyare dolare l’Taiwan, elo a zaynani heş lo mşadri. Xi laqi bıthır a rişone da şırak rabe d’Amerika-xıd Elon Musk di şırke d’Tesla, Apple d’Tim Cook, Nvidias d’Jensen Huang. Camgabe di tagorutho, gıdmıkle’ste cali methcadronutho bu haqlo di zarocutho, du hulmono, du turism udu ağono mqabıl da hawbe.