MUB frısle buyono bu yawmo şatonoyo di mşatsonuthayde

U Mawtbo Umthoyo d’Bethnahrin, frısle buyono bu yawmo şatonoyo di mşatsonuthayde tahtu ışmo; U cameydan gıdqomır i hiruthyede bu ağuno du Mawtbo Umthoyo d’Bethnahrin.

Bu buyonano di mşatsonutheyde MUB kmahke cala siyasat dıkmitaşe ba falqe dıkhoye u cameydan u komır; Bu ağuno qawyo, kiban dmaklina u tyomo du cameydan.

Kmıstaqbılina u yawmo şatonoyo di mşatsonutho da 20 ışne du Mawtbo Umthoyo d’Bethnahrin ba nısyune uba qmore d’ağuno dı 32 ışne. B’aykanoyutho i noşutho dkıtyo tahte tehdit du virus d’Corona u dıkcayşo qento u şwole yaqure, leşan dımmathlina u camaydan, dımtaksinale, dımşawşıtina a timoyothayde u trenale cali rağlo, kbena qale di ithuthaydan. Midıd a diktatöre du statuko dkıbci dımşahlıfi u kewano lu yuthrono druhayye, kımjarbi bu Madınho Mıscoyo dqışci u camaydan wi saqıbloyutho demoqratikoyto u kenşoyto.

A hılme di Mamlaxtho Cuthmanoyto me hatho kmitaqimi, u kmitanhıt la haye tahrazto du qatlo, di golutho udu terhiqo mu athro mqabıl da came. Cal ba esore emwothoye a manfacat dıkmimodi asas, kmidawım dmicamıs cayno cala hawbe wi lo kinutho dıkmisomi mqabıl du camaydan u Suryoyo-Othuroyo-Kaldoyo-Oromoyo.

MUB kmahke bu buyoneyde cala siyasat dıksaymi a hayle mqabıl du cameydan u komır.  Bşıkılat maşhılfe kmıhjım u kmihaqır cala timoyotho tawdithoye, marduthoye u makthabzabnoye du camadyan uda kenşe Mşihoye du Madınho Mıscoyo. I şultonutho di Qutnutho d’Turkiya dıkımjarbo dımşahlıfo i cito makthabzabnoyto d’Ayasofya dhawyo mal li yurtutho dı britho l’jemıc, bi siyasathe kıtla nişo dqışco i ithutho sukolayto macnawi da Mşihoye bu Madınho Mıscoyo.

Bu Iraq hem bu darğo qentrunoyo, u hemste bu qlimo d’Kurdistan hın folitiqore kıfxi ruxzo u nafre mqabıl da Mşihoye, u kzırci zarco di bcelıdbobutho. İ hiyoyutho etnikoyto du camaydan kmihaqro, u kmisım tuxmonoyutho u frişutho mqabıl du cameydan. B’Suriya kmiqadım lu camaydan xıd bnaymothoye du darğo tlithoyo, u kmıtre rahuqo ma zedqayde, u kmıtre larwal du maşıqlo du şuryono siyasi. B’Suriya u rejim du Bacath u hın hayle hrene, kobın lruhayye u dawro xıd a mmathlone du camaydan. B’Lebnon u falqo Maronoyo du camaydan wa falqe hrene, ba hjome dıkmisım acle mi termitho Şica di dawle du İran,  uda maşılmone Sunna dkıtne bu xtuto du tukoso marhıbono d’Dacış kmijarıb dmitadcıf u hatta dmıtre dılo athro.

Bu nişano mahıt ido cala mabuce momunoye d’Lebnon wu camaydan macbır bgawıd dı kriz momunoyo u mawbıl li faqirutho. A hayle du statuko du Madınho Mıscoyo ksaymi hboso cala tukose folitiqoye du camaydan, cala citotho, farsufe u kolın qamuthıd di hdoyutho umthoyto du camaydan.

MUB bu buyoneyde komır : Xıd Mawtbo Umthoyo d’Bethnahrin mqabıl da qdome lo noşoye dıkmisım calu camaydan gawonoyo bu Madınho Mıscoyo, kbena ağuno rabo. A şutose folitiqoye, tukosoye dımşataslan, a fulhone diplomatikoye dımalxilan, leşan dımşaklina i hdoyutho umthoyto du camaydan, dmawdıcina lu ray dı britho kula i dacwa di hirutho du camaydan u dqımrina darğo qlimoyo u emwothoyo statuyo. Me gabo hreno leşan dımtena la nişaydan kbena yuqro zıttır li hdoyutho umthoyto du camaydan, la ittifaqe b’hulmono cama came şbobe ula esore stratejikoye emwothoye.

U buyono d’MUB kmihthim bu şıklano: Şafıc u yawmo şatonoyo da 20 ışne di mşatsonutho d’MUB b’nesyune, u kıdrena a şlomaydan li şato di 21 b’iddica du qmoro udi hirutho u ksayminala iclan şato d’ağuno rabo. I wolitho makthabzabnoyto da mdabrone, da qadrowiye, da hadome, da sempatisan, da sanode uda mothonoye du Mawtbo Umthoyo d’Bethnahrin kulle, dsaymi harake lfuth da prensibe di hirutho u dmimathlo i dacwa du camaydan bşıkıl dıkmalıqyo. Me gabo hreno bi lhiqutho di zoxutho umthoydo da sohdaydan ksaymina qroyto lu camaydan dmitakıs bi rişonutho du Mawtbo Umthoyo d’Bethnahrin, leşan dmahrıwina kul şıkıl tıştıcınye u tahlukat dkito.  Bu asasano u yawmo şatonoyo di mşatsonutho udu ağuno du Mawtbo Umthoyo d’Bethnahrin howe brixo lu bınyonaydan, lu camaydan ula dostinaydan.