A comure di qritho d’Jınnet (Hazakh) dıkhoyın hani 40 eşne ban athrawotho di golutho mcayadlın u cedo du qadişathe Mor Gewargis

JINNET/HAZAKH, Tur Abdin – U cedano di Qyamto d’Moran Yeşuc Mşiho mcayadwo adşato ma comure di qritho d’Jınnet dıkhoyın hani 40 eşne ban athrawotho d’Almanya u Beljika. Bıthır mu cedo dsim bi cito d’Yuldath Aloho b’Hazax, a comure di qritho d’Jınnet mtayablın ruhaye dımcaydi’ste u cedo du qadişathe Mor Gewargis.

Leşan u cedano du qadişo, mhaydır muklo u ştoyo wa comure azzın l’Jınnet leşan dımcaydi u şahro d’Mor Gewargis bi qritho. Bi mawdconutho dmatilan me myaqro Alyas Vergili, a comure d’Jınnet maczamlın a comure da qıryawotho dkıtne şbobe lu şahrano u mcayadlın yawmano camhıdode bi fsihutho du zmoro u raqdo.

Lu şahrano du qadişo Mor Gewargis, hadır hol 70 man abne u bnotho di qritho d’Jınnet dıkhoyın ucdo bi golutho. A qıryawothani dkıtne hedor Jınnet du camo Kurdoyo’ne wa hayle Turkoye’ste, sımlın u duyoqo di mşaynutho di qrithathe, dkıtyo tabıc d’Şırnak d’Turkiya.