Adyawma bi şoctho da hsar d’Urifi, mşarele u zawho ruşmoyo du cufoyo du Papa du Vatikan-i qadişutho d’Mor Fransis qadmoyo, dımşanewole 21 bu yarhano d’Nison ma hayani a zabnoye

U wahdo rabo d’Mor Fetrus b’Roma d’İtalya bu yawmoyo du tbocofroso Emwothoyo’we. Bu wahdano, sim adyawma meqım me falge d’yawmo u zawho ruşmoyo du cufoyo du rişono di cito Qatholiqoyto-Papa Mor Fransis Qadmoyo dqayıthwole 21 bu yarhano strok u bıthır dkali lebe bu baytayde bu Vatikan.

Mor Fransis dkıtwe cımre 88 eşne umu athro d’Arjantin, hawile 12 eşne xıd Papa. Lfuth u qonuno di cito, u Papa hayko dımşane’ste, klozım dmicafe bu Vatikan. Bu wahdano d’Mor Fetrus, layım adyawma ba casro alfayo dıbnaynoşo me dukotho frişe dbritho u acmaye’ste malke u malıkyotho, rişone u mşale d’athrawotho frişe dbritho.

Beyn da hadire kıtwo u rişono d’Amerika wi barthzawgayde, u notarozo gawonoyo d’Emwotho Mhaydotho, u rişqutno d’Ukraina, d’Fransa, Brazil, d’Britania uğer wu maqşe u duyoqo di mşaynutho di mdito kula. İ slutho du cufoyo du Papa mşarewola adyawma ba 10 d’Urifi u mdawamwola 2 şoce u falge wi sagiyoyutho di sluthathe dımrayşıno mu kardinal Giovanni Battista Re simo bu Latinoyo.

3 yawme meqım mu zawhano du cufoyo, mahıtwo u fağro du Papa bi cito d’Mor Fetrus leşan u camo dhowele mkono d’tolıb xatır u athmıl casriye u lfuth i cade dkito, sxir u dahşo u adyawma bıthır mi slutho du cufoyo, nqil u Papa l’Santa Maria Maggiore dkıtyo qarıwto lu Vatikan u hiw lu cafro. U haşo gıdmdawım ucdo 9 yawme u bıthır gıdmşarın a fulhone du neqoyo d’Papa hatho lu Vatikan.