A Ezidoye mqadamlın talabe li şultonutho d’Boğdod

Taşdarto mi şultonutho du Iraq b’darğo celoyo, sımla socurutho li qastra d’Şigur u yatiwo cama mathlone di mdabronutho yothoyto d’Şigur, u camu gabo di hirutho udi demoqratoyutho Yezidoyo.

 Bi ytawtathe dıdrişo eba i aykanoyutho di mdabronutho udi mşaynutho d’Şigur, a mathlone da Yezidoye mqadamlınste a’talabaththe li şultonutho d’Boğdod bi sbutho di ctidutho d’Şigur.

 Taşdarto mi şultonutho du Iraq b’darğo celoyo, athmıl sımla socurutho li fnitho d’Şigur, u yatiwo cama mathlone di mdabronutho yothoyto, camu gabo di hirutho udi demoqratoyutho ucamu zawco di hirutho da neşe Yezidoye. İ taşdarto du Iraq kmişaklowa mu mşawrono di mşaynutho umthoyto Qasem Al Acraji, u rişono di mdabronutho du gayso du Iraq, u wakilo du rişono du şutoso di mşaynutho athronoyto, u mdabrono da n’istixbarat folhoye u menyono ma rabayhaylawotho d’Ninwe.

Bayn da sebwotho dıdrişi bi ytawtathe, i aykanoyutho di mşaynutho d’Şigur, u dawro da haylawotho d’Yezidxan, u dcoro da galwoye, u bnoyo u hethotho d’Şigur wu fulhono di mdabronutho yothoyto d’Şigur. Bi ytawtathe, a’mathlone maqrahlın li taşdarto du Iraq di mdabronutho yothoyto mşatso lfuth u mluwo da 120 du nomuso esonoyo du Iraq, u bırwihutho ste mqadamlın li taşdarto a’talabe du kenşo Yezidoyo.

Megabo hreno, i taşdarto d’Boğdod dmahwela awyutho camu kenşo Yezidoyo dhuwole qurbone ğalabe bu qrobo cala Dacış, hulaste şudoyo dgıdnıqlo a’talabe da Yezidoye lu rişwazire Mustafa Alkadhimi.

Bayn da talabe dımqadmi li şultonutho du Iraq, dmitaqım u qyomo d’Şigur dımdewo bayn di şultonutho d’Boğdod wu gabo demoqratoyo d’Kurdistan di KDP, dmimıd hşowo ma haylawotho di Peşmarga dıgrişiwo m’Şigur bu zabno du hçomo dsımwole Dacış i şato da 2014, dmitaqimo i sbutho du dcoro da galwoye Yezidoye ma bazare folitiqoye, dmisarhıbi a’fulhone di mcadronutho d’zıd m’18 alfo iqartho Yezidoyto dıdacriwo l’Şigur ba n’ışne dşaficina, dmitadcır u bnoyo di fnitho d’Şigur dıshifi a’botayda udhula sohde u mçarhe, dmibayın qonuno dkobe fsoso l’Şigur dhiyya dhıkmo ruha lfuth a’mluwe du nomuso esonoyo du Iraq wa qyome d’Emwotho Mhaydotho, dmısxori a’thume oyaroye d’Şigur qum da hçome, dmitahwe ruşmoyutho la haylawotho d’Yezidxan dıkmote u menyonaththe l’hedor d’700 farsufe bnişo dmımloyo i xalyutho di mşaynutho b’Şigur, dmiqadım snodo la haylawotho d’Yezidxan, dmıftoho i nuqazto du thumo d’Bara dcamu garbay madınho d’Suriya, udmisım duyoqo qaşyo cala qentrune da guboye du qlimo d’Kurdistan bnişo dlımisım hile mu gabo di KDP.