A hadome du parlamento d’Urifi maqbelın irmoyto dmitahıt tedbire casye cal Turkiya

A hadome du parlamento d’Urifi, maqbelın i rmoyto dımqadmo mu gabo du camo-EPP, dıkmıkrıh eba a fulhone lo qonunoye dıkmaşyo Turkiya b’Qufrus. Bi rmoytathe, kmıtlıbste mu Mawtbo d’Urifi dmahıt tedbire casye cal Ankara.

 Bi rmoytathe dıkmıgrış u zuhoro cali mudaxala d’Turkiya la krize hrene dkowın bu qlimo du Madınho Mescoyo u bı Qarabax. Turkiyaste baroyo rfıdla i qroytathe da qoyume Urifoye, dıktulbi dmitahıt tedbire cal Ankara bi sbutho du kboşo dcala thume du yamo d’Qufrus.

U parlamento d’Urifi, sımle athmıl qroyto dmitahıt tedbire yaqure cal Turkiya cala zawce u cala fulhone dıkmaşyo bı dukotho frişe dı britho; beynothaye ba thume du yamo d’Qufrus, bi mditho d’Varosha. Bi maqırhonutho di rmoytathe dımqadmo ma qoyume du gabo du camo EPP u dmaqbılo mu parlamento d’Urifi, kmıtlıb du parlamento dkorıh a camlani dıkmaşyo d’Turkiya ubebzabno, tlib mu Mawtbo d’Urifiste dmahıt tedbire casye calu athro.

3 qoyume du parlamento lo maqbelın i rmoytathe elo 631 maydolın u 59 lo huwlın u qolathe. Bi maqırhonuthathe mawdıc, u futoho di mditho d’Varosha d’Qufrus-fnitho dkıtyo bu duyoqo d’Emwotho Mhaydothoyo u bıthır mıd Turkiya ftıhla sahmo mi mditathe u mawdacla dgımitadcıro la Turkoye. Calu mamlo dsımle Erdoğanste d’Qufrus gıdmıfloğo l’2 athrawotho şarye, mahwe hfuxye u mawdıc dhano dyoşo di maqırhonutho du Mawtbo di Mşaynutho d’Emwotho Mhaydothoyo.

Wu futoho di mditho d’Varosha, belhude zıttır gıdmaqşe u kriz du qlimo. A qoyume Urifoye mawdaclınste, d’Ankara kull dkothe kımarhıqo ruha ma timoyotho u ma standarde d’Urifi u wa camle folhoye dıkmaşyo bu madınho du yamo Mescoyo, dyoşo cali morutho dan athrawotho hadome du Huyodoyo awkith du Yawnan u d’Qufrus wu snodo baroyo dkobo l’Azerbaijan, a camlayda b’Libya u b’Suriya belhude kobın husrono lu Huyodo d’Urifi.

Bu zabno d’Almanya, İtalya, Spania u Hungaria kıkolın calu dialog dcam Turkiya, Fransa u Austuria kıtulbi dmitahıt tedbire casye acla. Wu cali sbuthathe gıdsoyım u Huyodo d’Urifi knuşyo bu yarho dıbqamuthayna u mahıtle Turkiya, Brexit, i Corona uğer krize u şwole bu yawmoyayde.