MUB frısle egartho da buyoe calu hesoyo du hadomeyde Samuel Adam

U Mawtbo Umthoyo d’Bethnahrin-MUB frısle egartho d’Buyoe calu hesoyo du hadomayde Samuel Adam dbe Qawşe.

 Bi egartho MUB, kmahke cala fulhone dımqadamle Mnoho Samuel Adam wu ağuno dhule, u kmawdıc qul naqla gıdcoyış ba fulhonathe. 

İ egartho da buyoe dıkthiwo mi Sictho di rişonutho d’MUB kımmo; U Hawraydan Samuel Adam Qawşe u hadomo du Mawtbo Umthoyo d’Bethnahrin 26 bu yarhano mu kewo di Corona mvayacle a hayayde u nqil me beynothayna. U hesoyo du hawraydan Samuel Adam macbarle haşo ba lebawothaydan u da farsufe dudciwole. Midıd mıdle duktho ba şutose u tukose du camaydan u bu mafhum umthonoyo mqadamle teşmışyotho. Bu Swed ışne yarixe mıdle duktho ba sicotho di cito, u qmırle i haymonutho, u iqoro wi hubo di jamaca. Bu maşıqlo di mşatsonutho d’Suroyo TV bılhiqutho u bmoral rabo mıdle duktho ba fulhone. Xıd ha ma mşatsone du Hudro d’Babylon Media hule tacbo rabo leşan dıtore Suroyo TV cali rağlo.

Samuel Qawşe bi şato dan 1996 b’haymonutho du lebo mıdle duktho bu ağuno dıkmitaşe bi rişonutho du Mawtbo Umthoyo d’Bethnahrin MUB u hawi hadomo hfito. Trele di eqarthayde kula dımaqrıwo lu ağuno u dwela sempati. A wolyotho wi mşalotho dıknıfalwo acle bu haqlayde dılo manıciye bıthnihutho ume lebo mamtale li duktho. U hawraydan Samuel Qawşe trılelan Pratik dkibe dmaydinale mathlo lıruhayna. Lo mharhız ma hjome dsimi calu ağunaydan ulo ha yawmo mhalaqle dawse laxalf. Cal ıdacwo u Mawtbo Umthoyo d’Bethnahrin sıbyono du şuryono da şwole du camaydan kuleyo.

U Hawraydan Samuel Adam Qawşe 24 ışne kamile mıdle duktho bu ağunaydan ba haqle folitiqoyo u tukosoye. I wolitho asasi da hawronaydan kulleyo, dımmathli a timoyotho dıkımhaymanwo bınne u dımşawşıtilın zıttır leşan dımhaqıqina u sabro dkıtwole. İdicowe ba diloyotho di şarirutho, ifedekariye, wi camoyutho u diloyotho hrene, mırhamwo mu camo ğalabe. Calu hesoyo du Hawraydan Samuel Adam Qawşe bi qamayto ktılbina rişo basimo li bethzawgayde Zero Adam, la nacimayde, la ahunonayde u a farsufe di eqartho, la hawronayde, la hadome di mdabronutho d’Babylon Media Förening, li sictho di cito d’Mor Yahkub d’Södertalje. Ba timoyotho dmaqmarle lu ağunaydan qul naqla gıdcoyış beynothayna.