A hayle d’Qasad mhanelın u fusqono dmıdla Amerika bi sbutho da tedbire dmahıtla cala marhıbone noqufe d’Turkiya

A Haylawotho d’Suriya Demoqratoyto, mhanelın u fusqono dmıdla Amerika bi sbutho da tedbire dmahıtla cala marhıbone noqufe d’Turkiya b’Suriya.

Bi maqırhonuthathe a hayle d’QASAD sımlın’ste qroyto lu kenşo Emwothoyo ula tukose da zedqe noşoye dımdawımi dsaymi hboso folitiqoyo u dmimıd tedbire mqabıl da hayle dıksaymi hawbe mqabıl di noşutho.

İ wazirutho du momuno d’Amerika mahıtwola athmıl tedbire hathe cal farsufe u şutose dkıtne masre bu rejim d’Suriya ucal hın grube marhıbone dıkmısnodi me Turkiya. Beyn da farsufe dmahıt tedbire aclaye, kıtwo u rişono du grub d’Ahrar Alşarqiya dıktocın i mşalutho du qatlo di notrathrozo gawonoyto du gabo du Dactid d’Suriya Havrin Xalaf.

Cala tedbirani dmahıtla Amerika’ste, frıslın adyawma a Haylawotho d’Suriya Demoqratoyto maqırhonutho lu tbocofroso u mqadamlın a tahınyothathe li klaytathe dmahıtla Woşington cal mşale du rejim ucala hayle sanode d’Turkiya wu maşıqlo qonunoyo dgımitabde ba bethdine Emwothoye mqabıl da marhıbonani.

Bi maqırhonuthathe QASAD mawdacle, d’hathe i dawse qamayto dımhalaqla Amerika bi sbutho da marhıbonani, bıthır ma qroyotho dsımlın a tukose u şutose da zedqe noşoye leşan dmihaşwi a marhıbonani cala camle barbroye dıkmaşın a ğrobani wa rişonathe mqabıl da came d’mdinotho frişe d’Suriya.

QASAD mırle; Ahna’ste kısaymina qroyto lu kenşo Emwothoyo ula tukose da zedqe noşoye dımdawımi dsaymi hboso folitiqoyo u dmitahıt tedbire u dmihaşwi a  haylani wa snodathe cala hawbe barbroye dıksaymi mqabıl di noşutho. Kıtulbina, du kenşo Emwothoyo dfolıh leşan i kinutho da dıbhe-dilonoyith da dıbhe da dukotho dkıtne kbişe bu garbyo ubu madınho d’Suriya. idico’yo d’Ahrar al Şarqiya wa rişonayde kıtte makthabzabno malyo ma camle marhıbone uma hawbe du qrobo.