A hayle d’Qasad msıklın 2 marhıbone d’Dacış b’Der Ezzor

A Haylawotho d’Suriya Demoqratoyto bu snodo da hayle du koalisyon Emwothoyo dkıtyo bi rişonutho d’Amerika, msıklın marhıbone d’Dacış bu qlimo d’Deyr Ezzor.

Mawdıc ba cuqobani dsimi athmıl, msıklın a hayle d’QASAD tre marhıbone bi mdito d’Thiban dıknuflo 50 kilometre mu madınho d’Deyr Ezzor.

Lfuth u qentrun du tbocofroso da Haylawotho d’Suriya Demoqratoyto, a Mharbone sımlın athmıl casriye cuqobe bu madınho d’Deyr Ezzor u msıklın 2 marhıbone da istixbarat d’Dacış. Ba buqore dsimi acmaye, a marhıbone mawdelın ba hawbe frişe dsımlın uba hçomathe cala nuqazyotho folhoye d’QASAD.

A cuqobani simi ma hayle dilonoye d’QASAD bi mdito d’Thiban dıknuflo 50 kilometre mu madınho d’Deyr Ezzor u mtaybi bi methcadronutho du koalisyon Emwothoyo dkıtyo bi rişonutho d’Amerika.

Bi duktho dımsiki a 2 marhıbone, mqafe’ste kmoyutho rabtho d’zayne automat, buğre uğer lojistik folhoyo. Camani’ste mahıt ido cal tahwiyotho, egrotho, luhyotho d’ışmone d’tagore dmid zuze menaye u dbıthır qtili. 14 bu yarhano d’Ob, a hayle d’QASAD bu snodo du koalisyon Emwothoyo msıkwolın mşalo d’Dacış bu macırbo d’Deyr Ezzor.

Ba zabne haroyani’ste, a hayle d’QASAD wu koalisyon Emwothoyo maqşelın u mazıdlın a cuqobathe b’dukotho frişe hedor u qlimo d’Deyr Ezzor leşan u msoko da krılyotho da marhıbone d’Dacış, dıkmdawmi a gzomathe cala mdinoye.