A hayle Iraqoye kımdawmi ba cuqobathe dmaltımi a zayne lo qonunoye

Bıthır mıd ahayle di mşaynutho du Iraq mabdewolın athmıl hamle du teltimo da zayne lo qonunoye dkito bı dukotho frişe du Iraq, adyawma mawdıc dımsik 13 farsufe b’Boğdod u b’Basra dkıtwo acmaye zayne lo qonunoye.

 U malolo du gayso Iraqoyo  makadle, dımsıklın 10 farsufe b’Basra u 3 hrene b’Boğdod u mahıtlın ido cal kmoyutho rabtho d’zayne yaqure u xayife.

Bu taro di şişaltho da suikaste haroye dsimi cal mınyono dfarsufe hfite bu Iraq, a hayle di mşaynutho du athro sımlın 2 cuqobe frişe ha bi arişkoyto Boğdod wu hreno bi mditho d’Basra u msıklın 13 farsufe dkıtwo acmaye zayne lo qonunoye,

U malolo du gayso rabhaylawotho Yahia Rasoul dmawdacle dımsıklın 10 farsufe bu qlimo d’Basra dkıtwo acmaye zayne yaqure u kmıthomi bı dacwat frişe. Bebzabno sim cuqobo hreno b’Boğdod u msik 3 farsufe dkıtwolın zayne mescoye u xayife.

Rasoul mırle; A hayle di mşaynutho lkımsamhi u late ayya tolerans d’noşo dmahrıw i mşaynutho du athro u du camo u dıkmahrıw a mulkone farsufoye. A ğrobani baroyo gıdmitahwelın funoyo. Elo lfuth u qonuno du athroste, a mdinoye kıtte zedqo dhowelın ha zayno xayifo bu bayto.

B’Basra qtılwo 2 farsufe hfite meqım yarho uğerste maxlaswolın mu mawto bu zabno da hjome dsimiwo aclaye me farsufe dheş i hiyoyuthathe latyo idıcto. Bı Boğdodste qtılwo bu yarho d’Tamuz u yadıcthono di mşaynutho u holucdo lo makdo i hiyoyutho da hayobani dsımlın ahjome bu zabno dımtayıb tagliyotho mqabıl di şultonutho du Iraq.

Me gabo hreno ba cuqobe dsımlın ahayle di mşaynutho du qlimo d’Kurdistan, msıklın athmıl 2 farsufe dkıtwo acmaye 25 kilowiye d’gelone mtanwone. A 2 thimoye dkıtwın mi Suleymaniye, nqiwolın u samano li mditho d’Arbil leşan u zebono.