A neşe sıme taglitho mqabıl da dyoşe dıkseymolın Turkiya

A neşe dı Der Ezzor krıhlın adyoşe wa gunhe dıksamlın u gayso kaboşo dı Turkiya wa çatawiyayde ba fenyotho dıkbışile b’Suriya.

 A’neşe du madınho dı Der Ezzor bu halxo dmıştawtaflın ele, makadlın u snodaththe la haylawotho d’Suriya demoqratoyto bu nfoqo mqabıl dı Turkiya i kabışto.

 A’neşe du madınho di fnitho dı Der Ezzor, mıştawtaflın athmıl lu halxo dımşarele mu benyono du qentrun di claymutho, udımdawamle li bethkrihe gawonoyto d’Hajin. Lu halxano mıştawtafle a’hadome da şutose uda mawtbe gawoye du xtuto madınhoyo hedor di mditho dı Der Ezzor. A’mtagılyone u mtagılyotho ba slogane dmazcaqlın uba lohiyotho dımsıklın, krıhlın i mudaxala dıksaymola Turkiya ba n’arcotho d’Suriya wa gunhe dkımdawmolın bhaq da came.

Qum di bethkrihe d’Hajin bıthır mdıkle qatinto d’şetqo, i hadımto du mawtbo di athto Fatima Alsalem bi maqırhonutho dhula lu tboco froso mırla “mıştawtaflan lu halxano mqabıl dı Turkiya, u ahna ha camo na, ukrıfdina u kboşo dı Turkiya la n’arcothaydan, uktılbina ste dmisım u huroro da fenyothaydan dıkbişi m’Turkiya”.

Camgabıdathe, i rişonitho zawgoyto di athto claymtho d’Hajin Hala Almuhammad mırla “adyawma nafqina laşan dmahwena awyutho cam hawronayna ba haylawotho d’QASAD dkıtne ba gbine du qrobo, u kımminalın dıkmahtina ido bido acmayxu mqabıl dı Turkiya i kabışto, uksındina hawronayna dkıtne ba xandaqe mqabıl da hayle kaboşe”.

Hala bi maqırhonuthayda, sımla ste qroyto la clayme dkıtne bi golutho dıdıcri lu athro, udmıştawtıfi la haylawotho d’Suriya demoqratoyto d’QASAD, udımdafci u athraththe mqabıl Turkiya.Bıthır ma mamle dsimi mhın şutose di claymutho, u halxano hthim ba slogane dmazcaqlın mqabıl du gayso kaboşo dı Turkiya wa çatawiyayde.