A qoyume d’Australia kımdawmi bi mawdyonutho du Sayfo da 1915

U waziro catiqo du sutoro d’Australia u qoyumo hreno du athro mdelın i maqırhonutho du snodo di mawdyonutho bu qtolğenso dsim calu camaydan, calan Armınoye u cala Yawnoye ban 1915 mi mamlaxtho da Cuthmanoye.

 Bi maqırhonutho du snodano dımdele u waziro catiqo du sutoro d’Australia Joel Fitzgibbon wu qoyumo Andrew Wilkie, kmıtlıb di şultonutho federaloyto d’Australia dmıctarfo ba qtolğense dsim cala tlotho came Mşihoye.

 Bu yarho d’Şbot dı şafıcina, mşakalwo İnisyatif mşawtıfo di kinutho bu parlamento d’Australia leşan u mdoyo d’maqırhonutho dımtaybowa mu Komisyon Athronoyo dan Armınoye b’Australia, mu Huyodo Tibeloyo Othuroyo u fırco d’Australia wu Mawtbo da Yawnoye b’Australia, leşan u athro dmawde ba qtolğense da 3 camani.

Calathe ucdo, u waziro catiqo du sutoro d’Australiya Joel Fitzgibbon dkıtyo ucdo qoyumo bu parlamento du athro wu qoyumo Andrew Wilkie, mawdaclın u snodathe lu inisyativano u makadle di şultonutho federaloyto du athro, klozım dmawdiyo bu qtolğenso dsim calu camaydan, calan Armınoye u cala Yawonoye bi şato dan 1915.

Fitzgibbon u Wilkie dheş me meqım sanode di mawdyonuthathe bu Sayfone, sımlınste ğalabe naqlat mamle bu parlamento cali sbuthathe uba 2018’ste mqadamwolın rmoyotho lu mawtbo tahtoyo leşan dmiqadım mcadronutho lan Armınoye yatume u sohude du qtolğensano. Ba mamle dsımlın mırlın; Matina li qanacathe, du athraydan kmafıt ğalabe zabno bu teştcınyo da mele ubu droşo en a camani hzelın haşo rabo ba 1915 aw lo, u en u gunhano qtolğensowe aw lo. Me darbe da droşani, klozım kulayna dmafitina zıttır zabno cali  mawdyonutho du qatlo ba mo alfayo dıbnaynoşo cal dkıtwın me came etnikoye frişe.

Cala melaniste, u mşalo du tukoso dan Armınoye b’Australia mqadamle tahınyotho bı ışme du camo Armınoyo, Othuroyo-Suryoyo u Yawnoyo. 12 qoyume mawdelın bu Sayfo dan 1915 u 7 senatore. 25 bu yarho dı şbot, a tukose da 3 camani mtayabwolın hfitutho marduthoyto l’100 hadome du parlamento, mşale di wazirutho di baroyutho, falohe da makthıbe folitiqoye, akademikoye, u falohe du tboco froso u ğer, leşan dmitalım imdat di mawdyonutho bu qtolğenso dsımwola i mamlaxtho da Cuthmanoye calu camaydan, calan Armınoye u Yawnoye bu zabno du qrobo qamoyo dı britho.