A Rom Orthodoksoye u Suryoye simlen hfitutho b’Gütersloh mqabil du hçome barbroyo dsim cali cito di Mor Eliyo

GUTERSLOH, Almanya  Calu u furqoco qtolnafşoyo dsımwo meqım şabtho bi cito d’Mor Elias da Rom Malkoye Orthodoksoye di şawtho di Dwelca b’Darımsuq, mtayıb adyawma taklitho qum du bınyono di karxutho d’Gütersloh d’Almanya. Li taklithathe’ste, hadiri a şutose tawdithoye u marduthoye du camaydan dıkhoyın bi mdito.

Bi taklithathe camgabe dmaqım teşmışto cali ruho da Sohde u dtlib hulmono msarhıbo la mçarhe, sim’ste mamle frişe ubı qaşyutho krih u hçomo marhıbono dsim u tlib me Almanya umu kenşo Emwothoyo dım’amni i mşaynutho da Mşihoye b’Suriya u gawonoyith bu Madınho Mescoyo.

Bebzabno adyawma’ste bi şoctho da 15.00 mtayıb b’Paris d’Fransa taklitho mşayanto leşan a dıbhe di cito d’Mor Elias u tlib dmi’amni a zedqe da Mşihoye u dmisım u sutoro kamilo la dukothathe uda qalilotho tawdithoye u etnikoye hrene du qlimo bnişo dqudri dmacişi i ithuthathe wi haymonuthathe.

Camani’ste bi mdito d’Köln u b’Giessen d’Almanya’ste, gıdhudri a şutose u tukose du camaydan la takliyotho dgımitaybi. 25 bu yarhano, a hadome u noqufe d’ESU hadiri i slutho dsimo bi mdito d’Butsbach d’Almanya cali ruho da Sohde di cito da A Rom Malkoye Orthodoksoye.

Lfuth i mawdconutho dmatilan, ramhıl 29 bu yarhano bi şoctho da 16.00 a hadome d’ESU, i Claymutho d’ADO wa citothaydan b’Giessen gıdlaymi cama Rom Malkoye qum du bınyono di karxutho di mdito, leşan dmaclın camhıdode qolaye mqabıl da hçome marhıbone dıkmisomi cala Mşihoye b’Suriya.