A Suryoye Marunoye, Rum wu hadome d’ESU u HNB, mtayablın slutho mşawtafto cali ruho da Sohde di cito d’Mor Eliyo

BREMEN, Almanya – A Mşihoye di golutho, kımdawmi dmahwın i awyuthathe cama dıbhe du furqoco qtolnafşoyo dsımwo bi cito d’Mor Elias b’Darımsuq d’Suriya. Adyawma yawme d’Huşabo, şafıcwo şabtho kamılto calu furqoco marhıbono dsımwo calu camo mhaymno di cito da Rum Malkoye Orthodoksoye dkıtyo bi şawtho di Dwelca.

Calathe athmıl sim slutho bi cito d’Yuldath Aloho bi mdito d’Bremen d’Almanya. İ slutho mşawtafto simo cali ruho da Sohde di cito d’Mor Elias, ma hadome di cito Suryoyto Marunoyto, di cito da Rum Malkoye Orthodoksoye u acmaye’ste hadome du Huyodo Suroyo d’Urifi udu Huyodo da Neşe d’Bethnahrin.

Camgabe di slutho, sim’ste mamle me farsufe frişe calu hçomo marhıbono dsımwo cala Mşihoye di Dwelca u krih u ruğzo tuhmono qaşyo dıkmisım cala qalilotho tawdithoye u etnikoye b’Suriya. Ba mamlani tlib dmisım u sutoro da Mşihoye uda qalilotho hrene u dmihaşwi a hayobe da hçomani a marhıbone.