A şutose d’MUB mawdaclın cala hfitwotho b’Urifi leşan du duxrono du Syafo dan 1915

URIFI – U Huyodo Suroyo d’Urifi-ESU wu Huyodo da Neşe d’Bethnahrin-HNB mawdaclın i tahrazto da hfitwotho dgısaymi bi cohnutho da 110 eşne du duxrono şatonoyo du qtolğenso mayiro dsımwola i mamlaxtho da Cuthmanoye cam caşeryotho Kurdoye calu camaydan bu zabno du qrobo qamoyo dbritho.

Mawdıc di hfitutho dgımisomo b’Gutersloh d’Almanya 14 bu yarhano d’Hziron dkıtyo yawme d’Şabtho, gıdmşaryo bi şoctho da 18.00 bi Bethmardutho dkıtyo bi mdito. Bi hfituthathe’ste, gıdmitaqıth şamce leşan dmitathkıro i ruho da Sohde du camaydan. Bcayni yawmo-14 bu yarhano gıdhowe ltomo bu Beth Suryoyo bi mdito d’Hengelo d’Hollanda.

Mi şoctho da 21.00 uhola 22.00 gıdmitaqıth maşalat u gıdmitathkıri a Sohde du camaydan dınhiriwo dlo rahme, mi mamlaxtho da Cuthmanoye. 14 bu yarhano ESU u HNB b’Giessen kımawdıci, dgıdowe bi şoctho da 22.00 ltomo qum di qoyumtho du Sayfo b’Polheim u gıdmisım mamlo u gıdmitathkıri a Sohde.

15 bu yarhano d’Hziron dkıtyo u duxrono du Sayfo, a şutose d’MUB gıdlaymi bi şoctho da 21.00 b’Parco della Pace b’Locarno. Ba hfitwothani’ste, camgabe dgımitaqıth şamce u maşalat xıd remze di ruho da Sohde dıkmahwın u bahro du darbo, gıdmiqadım mamle u gıdmitaqım’ste teşmışyotho.

Bu tarano’ste ESU u HNB sımlın qrayto lu camaydan dhodır ba duxronano u tlib’ste ma şutose u tukose du cameydan dsaymi u duxronano du Sayfo u camhıdode dmahwena mrodo mqabıl da qotole dlo sımlın furşono inaqla dabici dlohın u makthabzabno wi hiyoyutho du cameydan.