Adam Schiff tlıble me Biden dmawde bu qtolğenso da 1915

B’egartho ftıhto dımşadarle u hadomo di kongre d’Amerika dkıtyo mu gabo da Demoqratoye mi marcitho d’Kalifornia Adam Schiff lu rişono Joe Biden, tlıble mene dmawde bu qtolğenso dan Armınoye.

Bi egarthathe Schiff mırle; Cal ışme dba mo alfayo d’Armınoye Amerikoye, a nacime wa nubğe du qtolğensano, kıtolabno menox dmawdıt bu qtolğenso dsim calan Armınoye ban 1915.

U senator demoqratoyo di marcitho d’Kalifornia Adam Schiff sımle mamlo bi kongre u mawdacle dımşadarle egartho lu rişono Joe Biden u dtlıble mene dımtabıq u şudoyo di kampanyade bi sbutho di mawdyonutho bu qtolğenso dan Armınoye. Bi egarthayde Schiff mırle; Fayış belhude kmo yawme , dbritho gıdmathkıro u duxrono şatonoyo da 106 eşne du qtolğenso sistematik dsımwola i mamlaxtho da Cuthmanoye cal milyon u falge d’neşe, gabre u tloye Armınoye.

Schiff mırleste; U duxronano u qamoyo’yo bu zabno di rişonuthathe u gıdhowe mkono rabo elox, dmafitıt u şudoyo dhuwolox bi sbutho di mawdyonutho bu qtolğensano la haye. Calathe kıtolabno menox, dımtabqıt u şudoyaydox lo camo Armınoyo b’Amerika, la nacime ula nubğe ula sohude du qtolğensano

Bi egarthathe Adam Schiff huwle mawdconutho rwıhto calu qtolğenso wa rdufye dsimi calan Armınoye u mırle; Kudcit ğalabe towo i şrorutho du qtolğensano u xıd rişono-i wolithaydox i qonunoyto’yo dımcadlıt u fawdo dsim holucdo ma rişone d’meqım menox u dmaqimıt u şetqo dcali mawdyonuthathe.

Schiff mırleste; U qtolğenso latyo qetro belhude du dacbar, elo qetro d’adyawmayo’ste u b’ğalabe athrawotho –xıd mathlo bu Sin, b’Turkiya i mudaxalayde l’Qarabax uğer, kımdawmi a hawbani mqabıl di noşutho. a hawbani lıkmikarıriwo adyawma, inaqla dkull noşo dkorahwo a qtolğenso du dacbar. Ba milyone d’Armınoye b’Yerevan u b’britho kula kınutri u mamlo dgısaymıt 24 bu yarhano d’Nison. Kıtli sabro Hat’ste dmıştawtıfıt caman athrawotho frişe d’Urifi, du Vatikan udhol 49 athrawotho hrene bi mawdyonutho bu qtolğensano u dmıjğolıt i şrorutho dcala hawbe barbroye dsimiwo calan Armınoye.