Adyawma sim u zawho du cufoyo d’Sohıdto Izla Neriman b’Mıdyad

MIDYAD, TURABDIN – Athmıl mati u nahşo di Sohıdto d’MUB İzla Neriman Özgun Rucyo li mdito dmawlıdo eba-Mıdyad, u mıstaqbıl ma hadome di iqartho, ma hawronayda da şutose d’Mawtbo Umthoyo d’Bethnahrin dımhalaxe u darbo haroyo acma, u gawonoyith umu camaydan dlayım me qıryawotho u dukotho frişe d’Turabdin ume athrawotho frişe di golutho. Lu zawhano’ste hadır mşale u hadome d’USUP mu athro d’Lebnon cama hadome d’HBA camu kohno di cito Suryoyto d’Barıtle di daşto d’Ninve, i Mtakasto da Neşe d’Bethnahrin, HNB, ESU.

Adyawma’ste b’froso hayo mi mdito d’Mıdyad, flığle Suroyotv u zawhano camu camaydan dlo qadır dhodır bu athro. Bu yawmano, maqimo i teşmışto harayto li Sohıdto İzla bi dayro d’Mor Abrohom u Mor Hobel bi mtaybonutho da kohne u şamoşe dhadiri me dukotho mşahılfotho, u acmaye’ste u qoyumo du camaydan George Aslan, taşdarto me DEM ume ğer şutose du qlimo. Bıthır mi slutho, sim mamlo bi cito cal ışme d’MUB mu rişono du Federasyon da Hudre Suryoye Evigl Türker dmahkele calu ağono dhuwla i Sohıdto wi dbihuthnafşo dkıtwola leşan i umthayda. Bebzabno cal ışme d’HNB Ayfer Gabriel kalyo cali ulsoyutho dkobo’wa i Sohıdto lu qmoro du lebo du farsufo uli iqoro dobo’wa lu renyo hiro.

Ba mamlani a hadome d’MUB huwlın şudoyo, dgımdawmi u ağono di Sohıdto İzla Neriman Özgun Rucyo. Mi iqartho’ste i hotho di Sohıdto Nişa Rucyo mahkela cala hayayda wu dawro dkıtwola bıgawe di iqartho. Bıthır ma mamlani, şafici a kohne, i iqartho, a hadome d’MUB camu camo dhadır ba hulhole, ba slogane uba qole citonoye bu halxo haroyo dlu iqoro di Sohıdto İzla la bethqbure di dayro, u hiwo u fağrayda xıd amane-lu cafro mbarxo dan abohotho-dmıstaqbele u dhdhınle i barthayde inaqla harayto xıd berule yaqirto. Bıthır mu cufoyo, daciri kulle li cito u mqadım fako d’rahme cali ruho di Sohıdto. Ramhıl’ste 16 bu yarhano bıthır mi slutho, gıdmitiw u yawmo haroyo bi cito d’Mor Barsawmo mi şoctho da 12:00 hola 21:00 d’casriye.