Afatıryarxe di cito Suryoyto u Armıneyto latimi laşan u kriz du athro d’Lebnon

Menyono d’fatıryarxe da citotho Suryoye u Armınoye layimi bu qentrun fatıryarxoyo di cito Suryoyto Marunoyto dkıtyo bu garbiyo d’Lebnon.

 Bu knuşyano, drişo i aykanoyutho momunoyto d’Lebnon wa tahrazyotho citonoye di mcadronutho noşoyto.

 U qentrun qaytoyo du kursiyo fatıryarxoyo Marunoyo di fnitho d’Aldiman bu garbiyo d’Lebnon, sımle athmıl safrayto baytoyutho l’knuşyo dmıştawtaflele u fatıryarxo da Suryoye Marunoye, u fatıryarxo da Suryoye Qatholiqoye, u fatıryarxo da Suryoye Malkoye Qatholiqoye, u fatıryarxo d’Kilikya dan Armınoye Qatholiqoye, u 2 hsayo mathlone du fatıryarxo dan  Armınoye Ortodoksoye.

Bu knuşyano, a fatıryarxe drışlın i aykanoyutho gawonoyto d’Lebnon bu taro du kriz qaşyo dıkloqele u athro bu haqlo folitiqoyo, momunoyo u kenşoyo, u hulınste mawdconwotho cala tahrazyotho di mcadronutho noşoyto dmtaybilın a citothathe, bnişo dımcadri anabne da marciyothathe dqıdri dnıfqi ma şartat qaşye dicyeşe.

Bebzabno, a fatıryarxe bu knuşyano kalın cali ulsoyutho da sniqwotho dıklozım dmiamni li claymutho, u dmibayanlın gade du fulhono, bnişo dmıkle mqabıl di goluthathe larwal du athro.Camgabıdathe, a rişone citonoye sımlın qroyto li şultonutho d’Lebnon dmıştacyo dawro hfito bi sbutho dmisım şuhlofe u reforme folitiqoye, bnişo du athro dmotele snodo momunoyo.

Me gabo hreno, fatıryarxo Mor İğnatiyos Yusuf III Yunan bu mamlo dsımle bu knuşyano makadle cali ulsoyutho di hdoyutho Mşihoyto bu maşıqlano, bnişo dmınfıq mqabıl du qento dkito calu dactid d’Lebnon.