Afriqya gıdhuyo noqazto di marhıbonutho

Amerika mzaharla di lahbe rabtho di marıhbonutho gıdşıfco li qıtca d’Afriqya.

Lfuth i sferyawmo Amerikoyto d’The Washington Times, u rabhaylawotho Steven Taunsind mawdacle da tukose marıhbone rabe xıd Alqacida u Dacış kul dkothe kzoyıd u haylaththe b’Afriqya.

İ sferyawmo Amerikoyto mşamahto d’The Washington Times, mawdacla d’general Amerikoyo b’darğo rabo mzaharle ba yawme haroyani di lahbe rabtho di marıhbonutho gıdmibarbızo bi qıtca d’Afriqya, u mawdacle dıkmahwe di qıtcathe kımtaybo ruha, laşan dhuyo i nuqazto tibeloyto hathto di tuhmonoyutho Maşılmonitho.

Lfuth Waşington Times, u rişono di mdabronutho folhoyto Amerikoyto b’Afriqya general Steven Taunsind, bu mamlo dsımle la gelyunore bu zabno dıkmisamwo tebiqat folhoye rabe bu athro d’Mağrıb, mırle “a’ferce da tukose marıhbone rabe xıd Alqacida u Dacış kzoyıd u haylaththe b’Afriqya dilonoyith bi fnitho du sforyamo. İ fnitho du sforyamo d’Afriqya kmişaklo m’falqe ma n’athrawotho d’Mali, Niger, Tşad, u Sudan u athrawotho hrene bu garbiyo d’Afriqya.

The Waşington Times bu tebayda mşalatla bahro calu zawco d’Alşabab dkıtyo masro camu tukoso marıhbono d’Alqacida, kıkobış wahde rwihe d’racotho rabe bu Somal, ub’şıkıl du rotin kmisım hçome marıhbone qatole bi fnitho du Qarno d’Afriqya.

U rabhaylawotho Amerikoyo Taunsind mahwele ilothnihuthayde li aykanoyutho di mşaynutho bhın ma n’athrawotho d’Afriqya, cıl mıdhani ışne dkımdawmo i kampanya wa cuqobe mqabıl di marıhbonutho b’Afriqya.

Taunsind dmawdacle di aykanoyutho kul dkothe kıhırwo bi qıtca d’Afriqya, mırleste “kmahwe du mede dıkmisım latyo makfiyono laşan dmitakılyo i lahbe rabtho di marıhbonutho dıkmıfroso b’Afriqya”.