Ahfuxye dcali sbutho d’Ayasofia kımdawmi

U rişono di marcitho d’Bayrut di cito Suryoyto Malkoyto Ortodoksoyto Hasyo Alyas Code, krıhle u fusqono dmıdle u rejim d’Erdoğan bi sbutho du şuhlofo d’Aya Sofia l’masığdo, u makadle di tawditho latyo ale dmıstacmılila a’folitiqoye laşan dmotın lu nişathe.

 Camgabıdathe, gelyunoreyto mu camaydan tlıbla mi şultonutho d’Kanada, dnıfqo moro li aykanoyutho d’Aya Sofia xıd bethcatiqutho makthabzabnoyto b’Stanbul.

 U rişono di marcitho d’Bayrut di cito Suryoyto Malkoyto Ortodoksoyto Hasyo Alyas Code, bu mamlo dsımle nu qerowo d’yawmıd d’huşabo sımle sturyo qaşyo u fusqono du şuhlofo d’Aya Sofia l’masığdo, u mırle “tawditho latyo ale dmıstacımlila a’folitiqoye laşan dmotın lu nişathe. Wa bote d’Aloho latne duktho li camoyutho tuxmonoyto awste lu bnoyo di rabutho. i camoyutho folitiqoyto u tawdithoyto lıkmıbnoyo cal hasıd da citotho, du şuhlofathe udu tloyo da surothathe. U iqoro du mqabıl zedqo u wolitho mqadaştoyo, ukul ha dıkdoyış u zedqano ganohoyo bhaq di noşutho kula. Mede dumoroyo dhowina fliğoye bu doro da’21 ducdo bayn d’grub dıksoyım qroyto lu şbuqyo uli ahonutho u grub hreno dıksoyım suikast iahonutho ukforıs u reğzo wi bcedlboboyutho”.

Me gabo hreno u athro du Yawnan kımdawım ba hfuxye dıkmahwe mqabıl d’Turkiya ucdo i rişathqutno du athro Katerina Sakelaropulu hawila mamlo cami qadişutho du Pappa Fransiz qadmoyo dımdaxıl bi sbuthathe d’Ayasofia.

İ rişathqutno du athro du Yawnan bi maqırhonutho dhula mahwela u hfuxyeyda mqabıl d’Turkiya u mırla Ayasofya klozım fayşo xıd bethcatiqotho xıd meqım.

Mxasra hreto, Susan Korah dkıtyo gelyunoreyto Kanadoyto me Ottawa u athto Suryoyto Orthodoksoyto grışla u zuhoro di şultonutho du athro, cali aykanoyutho du camaydan, dan Armınoye uda Mşihoye hrene dıkhoyın b’Turkiya. Bi egartho dıfrısla Korah, tlıbla mi şultonutho d’Kanada dnufqo moro li cito mşamahto d’Ayasofia u dlobo aftho l’Ankara dımşahlıfola l’masığdo. Susan Korah mırla; Hani zabno kımcaqbono i kampanya qşithathe d’Turkiya dkıtyo signal/remzo qriho mqabıl da Mşihoye dıkhoyın bu athro. Calathe klozım a hayle Emwothoye kulle, dnufqi moro li citathe u dlobın aftho l’Erdoğan dımşahlıf u statu d’Ayasofia.