Mid fusqono dhowe duyoqo qaşyo cala dafe kenşoye du nawlo b’Turkiya

U parlamento dı Turkiya fsıqle qonuno hatho dkobe aftho li şultonutho dhowela duyoqo rwıhtır cala dafe kenşoye du nawlo.

Calu medano, ğalabe ma tukose da zeqde noşoye mahwelın ilo thınihuthathe mqabıl du qonunano dıktofık Turkiya zıd lafi dektatoriye.

Athmıl bu quwolo dsımle u parlamento dı Turkiya, maqbele tarmitho hathto d’qonuno dkobo fsoso li şultonutho d’AKP dhowela duyoqo qşeytır cala dafe kenşoye du nawlo xıd Tiweter u Facebook u ğer dafe.

U qonunano u hatho kjobır adafe kenşoye du nawlo dıkmıştawtaflın zıd mı malyun Turkoye kul yawmo, dhowelın mathlono b’gawıd Turkiya udmatici la fusqone da botaydino bu zabno dıktılbi dmitaqım maqırhonutho mıhdo dafo kenşoyto du nawlo. Uloste i dafathe gıdmitahwela msomrişo momunoyo rabo yaste gıdmitanqıs u frosayda hul 90% awkith gıdhowe ğalabe casqo calu farsufo d’cobır li dafathe.

Lfuth u rişono du rejim dı Turkiya Erdoğan, u qonunano kıtle u nişo dmitaklın a’haqarat dıkmisomi bu darbo du nawlo. Erdoğan thımleste adafe kenşoye bu froso du fasad, da dugle ubu hjomo dcala zedqe farsufoye.

U qonunano u hatho, xlıqle lothnihutho bayn du camo Turkoyo u trele ğalabe şutose u tukose da zedqe noşoye dmahwın hfuxyo mqabıl di şultonutho d’Erdoğan.

U tukoso d’Hyumen Rayts Woç bu hfuxyo dmahwele mırle “adafe kenşoye du nawlo kımmathli ulsoyutho rabtho l’ğalabe farsufe dıkmıstacımli adafe laşan dqathlın mawdcınwotho. Wu qonunano kımzahır mı maşıqlo catumo du duyoqo dıkmisım cala dafe du nawlo”.