U Huyodo d’Urifi mahıtle kleyto naşıfto mqabıl da camle d’Turkiya

U Huyodo d’Urifi drışle i  aykanoyutho harayto da dawsat dkımhalqo Turkiya.

 Bi maqırhonutho dhule u mşalo da esore baroye d’Urifi Josep Borell lu tbocofroso mırle; Ba esore dkıtlan cam Turkiya, klozım dmaydo a timoyutho, a yuthrone wa qonune du Huyodo d’Urifi me qul di cayno.

 Bu knuşyo dsımlın a wazire di baroyutho du Huyodo d’Urifi bi sbutho d’Turkiya, hawi droşe qaşye u mqadım sturye naşife me hın wazire bıthır ma dawsat haroye dımhalaqla Turkiya, xıd mathlo bu şuhlofo di cito d’Ayasofya, u hjomo dcalu garbyo du Iraq, i sbutho d’Libya wu qetro du yamo d’Qufrus.

Bıthır mu knuşyano u mşalo da esore baroye du Huyodo d’Urifi Josep Borel huwle maqırhonutho lu tbocofroso calu knuşyano u mırle: Bu knuşyo dhawi, mqadım lo thınihutho u sturye mşahılfe l’Turkiya u dilonoyith bi sbutho du kroxo dcalu nafto bu yamo di Gozarto d’Qufrus.

 Bu mamlayde Borell mırle; An athrawotho d’Urifi kulle mıttafqene da esore dcam Turkiya mzaqzıqene u kito lo thınihutho mqabıl d’Turkiya. Kubcina dımdawmina a esoreydan cam Turkiya bı şart dımhalxo lfuth a timoyotho wa qonune d’Urifi u dlobo husrono la yuthrone du huyodo. En u şartano dlo mitanhıt la haye, inaqlayo gıdmaydina tedbire mqabıl d’Turkiya.