Alkadami kımdawım dsoyım şuhlofe bu athro du Iraq

U rişwazire du Iraq Mustafa Alkadami, kımdawım ba fulhone di şultonutho lfuth a wacde dhuwole leşan dımşatıs mdabronutho tawto lu athro.

 Bi lqayto dhawile cam hın ma yaqrotho dımvayaclın hadome ma yaqrothathe bu zabno da tagılyotho, hulelın şudoyo dıgtolıb hşowo ma farsufe dsımlın dişutho aclaye.

 U rişwazire du Iraq Mustafa Alkademi mawdacle dgımşatıs gudo şritho dsaymo buhone cala haqayıq da gedşe admonoye dıhzele u Iraq b’Teşrin u qamoyo di şato d’şaficina.

Alkadami mawdacleste bıthır mucdo u rişono da noture du qawmo du İran İsmayil Qaani laşan dcobır lu Iraq klozım moyıd viza xıd kulnoşo. Bi socuruthathe dkıtle ucdo hulan viza mawxa harkeyo.

Mawdacle u makthıbo du rişwazire Alkadami dılaqi hın ma yaqrotho dıhzelın husrono ba tagılyotho dhawın bu Iraq. U şamıc a tebe dhawın brişe da hadome da yaqrothani. Bu mamleyde mırle u Iraq kfoyıt me maşıqlo casqo elo, gıdkolina b’fothe di casquthathe.

Bu mamleyde dcama yaqrotho da mtagılyone mırle işıltonutho gıdsaymo kulmede dkito bu hayleydan laşan dımadıcro ışmoste dhowe u husrono da yaqrotho da mtagılyone. Bi sbuthathe Alkadami mırle gıdmisim buqoro bıhaq da hawbe dhawın mqabıl da yaqrotho da mtagılyone.