Alkadhimi yatıw cam Kenneth Mackenzie

A hayle di mşaynutho du Iraq, bu taro da cuqobe dıkmdawmi mqabıl di marıhbonutho, msıklın ışto hadome d’Dacış bi hiğmonutho d’Ninwe, u mfarqaclın tloth mcare dıkmitıstacmıliwo a marıhbone b’Kerxeslox.

Bu zabno dıkmdawım u qrobo mqabıl Dacış bu Iraq, u rişwazire Mustafa Alkadhimi drışle cama mşale Amerikoye i sbutho du groşo da hayle du koalisyon Emwothoyo mu athro.

Bu taro da fulhone dıkmisomi leşan dmitarkıwo i mşaynutho bu macırbo d’Ninwe, u şutoso di mşaynutho athronoyto du Iraq bıthır mıd matile mawdconutho ma istixbarat, sımle athmıl faho leşan u msoko 2 marıhbone dkıtlın ğensoyutho d’Suriya bu zabno dımnaselın dşufci a thume du Iraq. A marıhbonani dmıctaraflın dkıtne hadome d’Dacış u dmıştawtafwolın la hçome dsimi mqabıl da hayle di mşaynutho, u calathe mqadmi ucdo lu bethdino, bnişo dmihaşwi lfuth a qonune du athro.

A hayle dilonoye d’Kerxeslox u b’Tuz Xurmato, mabdelın adyawma cuqobo bnişo dmatimi a krılyotho d’Dacış, u dmitakle u rmoşaththe b’Salahıddin. Lfuth u buyono dfrıis, a hayle di mşaynutho, mfarqaclın 3 mcare dıkmıstacmalwo Dacış leşan dsoyım hçome marıhbone, uba cuqobe dsimi mqafe 127 foqucotho d’Dacış b’Kerxeslox. Wu rişwazire Mustafa Alkadhimi mıstaqbele athmıl u rişono di mdabronutho qentrunoyto d’Amerika- rabhaylawotho Kenneth Meckenzi.

Bi ytawtathe, a tre gabe drışlın i sdirutho mşawtafto bu qrobo cal Dacış, wa esore beyn du Iraq u Amerika bu haqlo da droşe, du snodo du lojestik ubu tehwiyo da mawdcınwotho l’hıdode b’şıkıl dkıtyo sanodo la mkone du şutoso folhoyo du Iraq. Bebzabno, mte l’awyutho dmitaybo i ytawto qamayto di sictho teknikoyto, bnişo dmibayın tahrazto dkiba dmafito la haye a fusqone da ytawyotho du dialog stratejikoyo beyn du Iraq u d’Amerika bi sbutho du groşo da hayle du koalisyon Emwothoyo mu Iraq.

Bu zabno dımşarelın a krılyotho d’Dacış dmaqwın ruhaye bu Iraq, i şultonutho d’Boğdod kıdorşo cam Amerika u groşo da haylawothayda mu Iraq, bi netiçe du hboso dıkmisım ma grube mzayne bnayqyome du İran. Calathe ha kımşayel cajaba u Iraq kibe dnofıq rişo cam Dacış en dmıgroşo Amerika mu athro.