Turkiya kımdawmo dmaqwiyo u haylayda b’İdlib
U gayso kaboşo d’Turkiya dıkmdawım dımaqwe u haylayde bi fnitho d’İdlıb bu garbay macırbo d’Suriya, mşadarle konvoy folhoyo hatho lu bethtawso folhoyo d’Taftanaz dıknofıl bu taymno di fnitho d’İdlıb.
Mxasra hreto, 30 farsufe dıkmıtlobi mu rejim d’Suriya mawfıqi cama yaqrothathe mi mdito d’Alqunaytira dıknuflo bu taymno d’Suriya, u nqili li fnitho d’Albab dkıtyo kbişto ma hayle Turkoye bu garbiyo d’Suriya.
U gayso kaboşo dı Turkiya mşadarle konvoy folhoyo hatho li nuqazto dkıtle bu bethtawso folhoyo dı Taftanaz dıknofıl bu taymno di fnitho d’İdlıb bu athro d’Suriya. Lfuth i mşatasto d’Suriya da zedqe noşoye, u konvoy dıkmişakıl m’tanqat radoyotho folhoye mqabıl da buğre u foqucwotho u radoyotho hrene matcıne topat yaqure, athmıl bu darbo di nuqazto d’Kafarlusin du thumo cam Liwaa Aliskandaron şafici la n’arcotho d’Suriya u maftelın fothaye lafi nuqazto folhoyto dkıtyo bu bethtawso dı Taftanaz.
Meqım mathe 14 bu yarhano ste, Turkiya mşadarwola 20 kamyone matcıne mcadrınwotho lojestik la nuqazyothayda dkıtne bi fnitho d’İdlıb bu garbay macırbo d’Suriya. Me gabo hreno ubu taro du şuhlofo demoğrafoyo dıkmisım bi rocyutho da tlotho athrawotho d’Astana Rusya, Turkiya wu İran, mawfıq 30 yaqrotho mi hiğmonutho d’Alqunaytira dıknıflo bu taymno d’Suriya, u mşadri li mditho d’Albab dkıtyo kbışto m’Turkiya uma çatawiyayda mi şato da 2016 uhul ucdo bu garbiyo d’Suriya.
Lfuth i mşatasto d’Suriya da zedqe noşoye, tlotho base dımşadri li qastra d’Im Batina bi hiğmonutho d’Alqunaytira, nqilın 30 farsufe dıkmıtlobi mu rejim d’Suriya cama yaqrothaththe awkith hedor 150 farsufe mawbıli li fnitho d’Albab dkıtyo kbışto m’Turkiya bu garbiyo d’Hlob.
U nqolo da farsufani athi luhwoyo bi awyutho dhawyo bayn du ferco di mşaynutho folhoyto du rejim d’Suriya, a’haylawotho Rusoye, i sictho qentrunoyto di daşto d’(H)oran uhın ma rişone da caşıryotho di fnitho. An’arbıco gabani 15 bu yarhano matınwo l’awyutho dmitawfıqi a’30 farsufe dıkmıtlobi mu rejim d’Suriya mi hiğmonutho d’Alqunaytira. U huwwe muhle hul athmıl yawme d’hamşo uloste u rejim mhadadwole dgıdsoyım hçomo cali qastra d’Im Batina bu taymno d’Suriya.