Alkazimi u Plasxart drışlın a hıdriyat da guboye du parlamento du Iraq

U rişwazire du Iraq Mustafa Alkazimi mıstaqbele bu qentrunayde bı Boğdod, i mathlonitho dilonoyto du notarrozo gawonoyo d’Emwotho Mhaydotho Jenin Plasxart.

Ba droşe dhawın bi ytawtathe, atre gabe bu zyudo dkulle kalın cali sbutho da hıdriyat da guboye msarhıbe du parlamento.

U makıhtbo du tboco froso d’Alkazimi, mawdacle du rişwazire du Iraq mıstaqbele bı Boğdod i mathlonitho dilonoyto du notarrozo gawonoyo d’Emwotho Mhaydotho Jenin Plasxart. Lfuth u buyono dıfris, atre gabe bi ytawtathe drışlın i methcadronutho bayn du Iraq u Emwotho Mhaydotho, wu snodo di şalyutho du Iraq. Bebzabno, Alkazimi u Plasxart drışlın i sbutho da guboye gawonoye msarhıbe du parlamento wa hıdriyatathe, elo lımbayın heş u siqumo dgıdmabdın ebe a’guboyani.

Alkazimi bu mamlo dsımle, makadle i ulsoyutho du dawro dıkmıştacyole Emwotho Mhaydotho bu snodo du komisyon şaryo da guboye bu haqlo du teknik uda duroşe, u mawdacleste i yasifutho dkıtla i şultonutho dhowın aguboyani şarye u zalile lfuth aprensibe emwothoye, udımşarıri anişe dkıtle u camo Iraqoyo lafu dactid.

Alkazimi grışleste u zuhoro cali şultonuthayde dkıtyo b’fusqono kamilo, dsaymo u garanti du snodo lojestik da guboye du parlamento, u dımamno arcutho mşayanto u butja lu syomathe.

Camgabıdathe, u rişwazire du Iraq wi mathlonitho emwothoyto drışlın atagılyotho mşayne du protesto xıd zedqo dıkmisım u garantiyayde mu nomuso esonoyo, u mu gabayde Alkazimi mawdacle di wolitho di şultonuthoyo dsaymo u sutoro da mtagılyone, dobo funoyo la talabathe u dsaymo buqore şarye bi sbuthathe.