Almanya mawdacla ğıdobo inaqla qamayto zayne d’masafe rahıqto li Ukraina. Russia thımla Sirbia bi nxilutho

BERLIN / MOSKO – I wazirutho du sutoro d’Almanya mawdacla d’Ukraina gıdhowela calqariwo mkono dmıstacımlo inaqla qamayto zayne d’masafe rahıqto, wa zaynani gıdmısnoci b’şıkıl mşawtfo cam Almanya. 

Bebzabno, u rişwazire d’Almanya Friedrich Merz bu qubolo dsımle lu rişqutno d’Ukraina Volodemir Zelenski bı Berlin mırle “gıdhowelan methcadronutho bu haqlo du snoco da zayne. U medano kibe dhowe b’Ukraina yaste harke b’Almanya”. 

Kmisım texmin du snoco da soruhe gıdhowe bi mdabronutho di şırke du snoco da zayne d’Ukraina, elo a’mluwe wa falqe da soruhe gıdmitasılmi m’Almanya. 

I wazirutho du sutoro d’Almanya bu buyono dıfrısla, mawdacla d’menyono celoyo ma soruhani dıkfayri l’masafe rahıqto gıdmısnoci bi şatathe, baynothaye a’soruhe qadmoye kibe dmıstacmelın u gayso d’Ukraina balhude bıthır kmo şabe. I wazirutho Almanoyto mawdacla ste da folhe Ukrainoye latne sniqoye l’duroşe hrene laşan dmıstacımli a’zaynani. 

M’gabo hreno, an’istixbarat baroye d’Rusya SVR, thımla şırkat du sutoro d’Sirbia dıkmohın buğre b’hasıd dı Mosko, cal di şultonutho d’Belgrad dkıtyo noqufto l’Mosko m’zabno yarixo, kımzabno ucdo zayne lu athro d’Ukraina. 

Bu buyono dıfrıslın an’istixbarat baroye d’Rusya mırlın ste “a’şırkat du sutoro d’Sirbia kımzabni buğre l’Kiyev bu darbo d’athrawotho tlithoye, baynothaye athrawotho dkıtne hadome bu Nato xıd Tşek, Polonia u Bulgaria”.