Almanya mıdla fusqone qaşye mqabıl da gurube qaşye maşılmone

Almanya bıthır me Hızbullah dacişjiye u istixbarat d’Suriya ucdo mıdla fusqono dı makle u yulfono di tawditho du şutoso d’Turkiya dkıtla bi hiğmonutho d’Hessen.

Sabab du tekliyo du yulfonanoste mahwe du şutoso dkıtle imşalutho du yulfono snidoyo l’Erdoğan mawxa makle.

Lfuth u tebo dıfris mhın ma mabuce du tboco froso bi hiğmunutho d’Hessen d’Almanya u bethdino maklele u yulfono di maşılmonutho dkıtwe bu duyoqo  du huyodo di maşılmonutho turkoyto  da sıbwotho di wazirutho di tawditho.

I celtho dı mahwelın dı maklelın u yulfonano di maşılmonutho hiye du şutosano dkıtyo bu duyoqo qariwo u kmısnıd me Erdoğanyo.

Bi hiğmonuthathe d’Hesen kito qariwo 300 alfo barmothoye me Turkiya Almanya maklela u fsoso du yulfono di maşılmonutho dkito. Lfuth hın ma yaducthone u profesoriye dsımlın u buhono du tekliyano mawdaclın du medano ucdo sim bi hiğmonutho elo bu zabno dothe gımitarwıh b’Almanya u gımathır cala galwoye turkoye d’Almanya.

Me gabo u bethdino di bethdino d’Duseldorf bu fusqono dhule fsıqle di athto dacşciye dkıtyo cımra 33 ışne gıdımxo 5 ışne u 3 yarhe hbuşyo mcal fothe da hawbe dsımla bu athro d’Suriya cama marıhbone d’Dacış.

I athtathe dkıtla barmothoyutho u şerşoyutho almanayto hiya cam 3 abneyda nahitowa l’Suriya u mharabla ba safat dı Dacış u sımla hawbe yaqure.

Bu fusqono du bethdino dhiw mir a dacşciyathe sımla hawbe rabe u molafla a nacimeyda tuxmonoyutho d’Dacış.