Amarciyotho d’Almanya u d’Hollanda di cito Suryoyto Ortodoksoyto frıse mawduconutho calu kewo di Corona

İ marcitho d’Almanya udı Hollanda di cito Suryoyto Ortodoksoyto, frıslın mawdconwotho bi sbutho du kewo di Corona. Bi marcitho d’Almanya Mor Filiksinos Matiyas Nayiş mawdacle bu facebok, dgorış ramhıl u Qurobo Alohoyo.

 Bi marcitho d’Hollandaste bıthır mu fusqono dmıdla i şultonutho, a citotho lo kowe dhowe ebeye slawotho, cal dlo kowe dlotım zıttır me 100 farsufe lıhdode.

 Bi egartho dfrısle hasyo Mor Filiksinos Matias Nayiş-u efetrufo fatıryarxoyo di cito Suryoyto Ortodoksoyto b’Almanya, kıtolıb mu cameydan dmoyıd tedbire mqabıl di Corona u xıd cito, dımhalxi lfuth a fusqone dımbayanla i şultonutho.

Ramhıl yawme d’Huşabo, hın ma citotho di marcitho d’Almanya gıdhowın ftihe u hın menaye gıdmısxori lfuth a fusqone dmıdlın a hiğmonwotho d’Almanya.

Camgabe di egartho u efetrufo mşadarle tekso d’slawotho, leşan a kohne dımsalın i sluthathe i dilonoyto dımtaybo calu kewo di Corona. Be bzabno bu mamlo dhawilan camu efetrufo fatıryarxoyo d’Almanya mawdacle, d’ramhıl gıdfırsi u Qerowo Alohoyo dgımisım bi rişonuthayde bi cito d’Yoldath Aloho di mdito d’Bebra bu darbo du facebook.

Me gabo hreno i marcitho d’Hollanda dkıtyo bi rişonutho du hasyo Mor Poliqarpus Awgin Aydin mawdaclın, da citotho gıdhowın sxire metul di şultonutho mıdla fusqono dlıkowe dhowe zıttır me 100 farsufe latime bıhdo duktho. Bu şıkılano a hfitwotho xıd caza u ğer munasabat, lıkowe dlotım ebe zıttır me 100 farsufe.

Bi egartho di marcitho kmitamır; Bıthır mıd i şultonutho Hollandoyto fsıqla dlıkowe dlotım ğalabe camo lıhdode, a tarce da citotho wa salone lıkowe dmisım ebeye hfitwotho hol ha bu yarho d’Nison dıbqamuthayna. Bu şıkılano bıthır mi egartho dfrıswole i qadişutho du fatıryarxo Mor İğnatiyos Afrem II bi sbutho du kewano, a marcoyothoste mşarelın dobın mawdconutho la mhaymıne.