Amerika bu maşıqlo haroyano mzaharla Turkiya ğalabe naqlat

Bu zabno haroyano, a esore beyn Amerika u Turkiya mwatın dılo qolo celoyo, metul belhude bi şabthathe i harayto, Amerika sımla arbac maqırhonwotho d’zuhoro l’Turkiya.

 Amerika gzımla Turkiya bu kroxo dcalu nafto bu yamo, bi sbuıtho du bethdino dhuwla Turkiya, u me gabo hreno u Yawnan mzaharle Turkiya.

Bıthır mu zuhoro dsımla Amerika l’Turkiya bi sbutho d’Ayasofya l’Turkiya, mamtela lıbola dheş lo şrela u qatro da Mulkone da Suryoye u da came hrene dlatne maşılmone Suna. Bıthır mu bethdino dıfsıqle lu cawodo di izgadutho d’Amerika dkıtyo b’Turkiya  Metin Topuz dhiw ele 8 ışne hbuşyo bu thomo di marıhbonutho, Amerika mahwela hfuxyo di sbuthathe gıdmitoqo timo cal Turkiya.

İ izgadutho d’Amerika dkıtyo b’Turkiya bi maqırhonutho dhula mırla ğamo rabo ktocnina bu fusqonano dhiw dılatyo triso metul u Metin farsufo dıcwıdle 30 ışne sideyna u kul zabno mhalaxle ba fuqdone dkıtlan.

Bi sbutho du kroxo dıksaymo Turkiya ba maye di Gozarto d’Qufrus Amerika sımla sturyo qaşyo u mırla, A zawce dkıtla Turkiya ba maye d’Qufrus kmacıjzi, a sıbwothani kmazidi u tahrik wa şğuşye bi fnitho, mawxa naqqa hreto kmawdcina la mşale d’Turkiya dımaklın u kroxathe dcalu nafto ba maye di Gozarto d’Qufrus.

U musteşar di wazirutho di baroyutho d’Amerika Mathew Palmer sımle u mamlano bu konferans emwotho dımtayabwo b’Aten du Yawnan, be bzabno u mamlano athi bıthır mi maqırhonutho dsımwole Erdoğan dmırwole gımdawmina u kroxeydan dcalu nafto u callu Gaz ba maye d’Qufrus u d’Libya.

Me gabo hreno bi maqırhonutho dsımle u rişwazire du Yawnan Kiryakos Miçotakis mırle en Turkiya dsaymo ixlal a athumeydan gıdhızyo husrono rabo, wu ittifaq dsımla cam Libya latyo maqıblo, Turkiya trodıdco bi sbuthathe latyo belhude u Yawnan mqabıl didayo elo a athrawotho d’Urifi kulene.

Miçotakis bu mamleyde mırle: u ittifaq d’Turkiya dsımla cam Libya bi sbutho du yamo latyo maqıblo elo u ittifaq du Yawnan dsımle cam Libyayo dkıtyo Ruşmoyo.

Bu şıkılano agzome wa tahdide dkızın l’Turkiya kzaydi, u dilonoyitho bıthır mi sbutho d’Ayasofya d’Erdoğan mabdewole bu zabnano laşan malzame siyasi laflawğul kımmi a mfaşqone siyasi.