Amerika frısla taşroro cali hirutho tawdithoyto bu athro dı Turkiya

I wazirutho di baroyutho d’Amerika bu taşroro dıfrısla cali hirutho tawdithoyto di şato da 2020, mawdacla da dıyoşe tawdithoye b’Turkiya kımdawmi bırwihutho.

Bu taşrorayda Amerika mawdacla dı Turkiya i şato da 2019 mahrawla dukotho u nuqazyotho tawdithoye, u sımlaste cnufyo kenşoyo bıhaq da came qalile du athro.

I wazirutho di baroyutho d’Amerika frısla u taşrorayda u şatonoyo cali hirutho tawdithoyto dıbritho di şato da 2020. Bu taşrorano kmibayın duktho rwıhto li aykanoyutho di hirutho tawdithoyto b’Turkiya.

Bu taşrorano kmitawdıc da zedqe da qalilwotho tawdithoye xıda nışne dmeqım kımdawmi heş dmidoşo bırwihutho b’Turkiya. I şultonutho kımdawmo dsaymo mudaxala ba sebwotho gawoye da came tawdithoye, ukmınco dminaqın a’hadome du mawtbo di mdabronutho da şutose dlatne Maşılmone, ukmahto qayde hathe cala guboye dhani zabno dıkmıntori du fatıryarxo di cito Şlihoyto Armınoyto.

Be bzabno, u taşroro Amerikoyo mawdacle da mşale folitiqoye udi şultonutho dı Turkiya, frıslın mamle di bceldboboyutho u mqabıl di Şimoyutho, ubi şato dşaficina lımhalıq ulo dawse bi sbutho du teqimo du qonuno dıkmoyıd hşowo ma farsufe dıkkıfri b’Aloho. Ubi şato da 2019 a’dukotho wa nuqazyotho tawdithoye u marduthoye da n’Armınoye, da Suryoye uda Yawnoye wa bethıqburaththe hzelın husrono rabo yaste shifi.

Camgabıdathe, u taşroro grışle u zuhoro calu rişqutno Erdoğan dhadırwo bu yarho d’Ob I şato da 2019, u zawho du tehito di şetısto qadmoyto di cito Suryoyto Ortodoksoyto b’Stanbul dıkmıhşowo i cito qamayto dıkmişatso bu makthabzabno di qutnutho dı Turkiya, elo bebzabno u taşroro Amerikoyo mawdacleste d’Erdoğan sımle qroyto dmişahılfo i bethcatiqutho d’Aya Sofia dkırwa cito da Yawnoye l’Masığdo.

Cali sbutho da Calawiye, u taşroro di wazirutho di baroyutho d’Amerika thımle I şultonutho dı Turkiya bu dıyoşo di hirutho tawdithoyto di qaliluthathe dıkmıhşowo i qalilutho rabtho dkulle du athro, u hawxa mdawamle “a’Calawiye heş lıkqathlın ictiraf ruşmoyo ba dukothaththe di cabade cıl mıdkito fusqono mu bethdino d’Urifi da zedqe noşoye. Be bzabno a’dukotho mqadşe da Calawiye mahırwi bu qlimo d’Sivas”.

U taşroro Amerikoyo grışleste u zuhoro calu bethdino celoyo dı Turkiya dıfsıqwole i şato dşaficina dmişahılfo i bethcatiqutho d’Chora Kariye dkıtwa cito da Yawnoye l’masığdo.