Amerika gdobo 5 milyuno dolare luha dıgdobe mowduconutho cali tagorutho d’Dacış

Amerika mawdacla, dıgdobo 5 milyune dolare luha dkıtle mawdconutho cali tagorutho lo qonunoyto dıkmaşın a ğrobe marhıbone d’Dacış bu haqlo du nafto u da athare maktabzabnoye.

 İ mawdconutathe, mi wazirutho di baroyutho d’Amerika hiwo. Bebzabno mawdıc, da hayle Iraqoye, sımlın cuqobe casye cala dukotho d’Dacış b’Daquq u msik 4 marhıbone b’Ninve.

İ wazirutho di baroyutho d’Amerika mawdacla, dımbayanla 5 milyune dolare lu ha dkıtle mawdconutho cali tagorutho lo qonunoyto dıkmaşın a ğrobe marhıbone d’Dacış bu haqlo du nafto u da athare makthabzabnoye d’Suriya u du Iraq.

I wazirutho mırla; A ğrobe marhıbone xıd Dacış kımaqwın u momunathe wa hjome marhıbone dıksaymi bu darbo du zebono lo qonunoyo du nafto da athare catiqe. Beyn da athare makthabzabnoye dkımzabni a marhıbone kito zuze, berule, haykle, luhyotho du tino uğer timoyotho yaqure.

Ğalabe ma atharaniste gniwiwo bu zabno du kboşo d’Dacış calu Iraq u Suriya ba 2014 wa marhıbonani walaw ğlibi ba 2017, heş kmıstacmıli taktike u kımzabni nafto u athare leşan dmaqwın ruhaye. Camgabedathe i kongre d’Amerika sımla qroyto, dmitahıt u tukoso d’Badır bi lohitho di marhıbonutho.

U tukoso Iraqoyo, qariwoyo lu İran u ktocın i mşalutho da hjome dsimi cali rişizgadutho d’Amerika meqım şato. Bıthır mu hjomanowe, dıqtiwolın a hayle Amerikoyo u rabhaylawotho İranoyo Qassem Suleymani b’Boğdod. Me gabo hreno, a hayle oyaroye du Iraq sımlın cuqobe cala dukotho dıktolın a marhıbone ruhaye bu garbyo du athro.

Ba cuqobe dsimi mi hawa u mi naşfe cala marhıbone b’Daquq bu taymno d’Kerxeslox, hiw husrono rabo la dukotho d’Dacış dheş kımhadıd i mşaynutho d’Kerxeslox, Diyala, Salahaddin, Ninve u Anbar. Bı cuqobo hreno dsim bi hiğmonutho d’Ninve lfuth a mawdconwotho ğnize dmatilın, msıklın a hayle Iraqoye 4 marhıbone.