06/02/2021

Amerika gımdawmo uhboseyda cal Turkiya bi sbutho da soruhe d’S-400

İmdabronutho du rişono hatho d’Amerika mawdacla, dgımdawmo bi klayto dmahıtwola i şultonutho catıqto d’Woşington mqabıl d’Turkiya bi sbutho du sistem da soruhe d’S-400.

 Bebzabno u rişizgado d’Amerika b’Ankara mırle; Kıtlan sabro du şwolano du sistem d’S-400 dmışre cam Turkiya.

U malolo di wazirutho du sutoro d’Amerika John Kirby sımle athmıl mamlo la gelyunore u m’akadle u mırle; İ saqıbloyuthaydan l’Turkiya bu zwonayda du sistem d’S-400 lo mşahlıf. Ahna heş kıtulbina me Ankara, dlo zawno udlo mıstacmılo u sistemano d’zwınwole me Rusya ba 2019.

Turkiya maftewola fotha l’Rusya, bıthır mıd lo mıttafaqwola cami şultonutho catıqto d’Barak Obama d’zawno soruhe du Patriot mena. U sistemano du sutoro da thume oyaroye, kmitıstacmıl mi sagiyoyutho da hayle hadome bu NATO.

Kirby mırle’ste; Turkiya athro ulsoyo’yo la hadome du NATO, elo u fusqonayde du zawono d’S-400, saqıbloyo’yo l’Amerika ulu NATO kule. Turkiya hawila ğalabe naqlat mkone d’zawno u sistem du Patriot me Amerika, elo naqla hreto azza u zwınla S-400 me Rusya u bu şıkılano kmitahwe aftho l’Mosko zıttır dmaqwıyo ruha.

Bi sbuthathe d’S-400, u rişizgado d’Amerika b’Ankara’ste David Satterfield mawdacle u sabro dkıtte, di sbuthathe beyn Turkiya u Amerika cal qariwo dmisafyo u mırle; Kıtlan sabro dmışre u qetrano, elo en dothe dlo sofeste ahna gıdmdawmina dmahtina u yuqraydan cali methcadronutho dkiba dhuwyo acma bhaqle frişe dlıgmiathri ma tedbire dgımitahti cal Ankara.

Check Also

USAİD kımdawım d’sonıd u maşıqlo du bnoyo u du hethotho di daşto d’Ninwe

U tukoso Amerikoyo du quyomo Emwothoyo-USAİD, kımdawım d’sonıd u maşıqlo du bnoyo u du het…