Amerika gsıxro a 2 İzgadwotho dkıtla b’Rusya

İ şultonutho d’Amerika kıtla plan dı suxro a 2 izgadwotho haroye dfayışla b’Rusya. En dothe dmısxori a izgadwothaniste, gıdfaşla Amerika belhude i rişizgaduthayda b’Mosko.

 Lfuth u tebo dhuwlın hın mabuce l’CNN, meqım şabtho mşadır egartho mi kongre d’Amerika li wazirutho di baroyutho du athro, dıkmıtlıb eba dmısxori a izgadwotho Amerikoye b’Rusya. 

Bu zabno dfayışle u rişono Amerikoyo Donald Trump belhude yarho bu Qusro Heworo, kımdawım dımnase dsoyım şuhlofe. Lfuth u tebo dıfris bu tboco froso Amerikoyo, i şultonutho kıtla ucdo plan, d’suxro a 2 izgadwotho haroye dfayışla bu madınho d’Rusya.

Lfuth u tebo dhiw me mabuce Amerikoye l’CNN, a fulhone di izgadutho Amerikoyto dkıtyo b’Vladivostok bu madınho d’Rusya gıdmısxoro wa fulhone di izgadutho dkıtyo Yekaterinburg bu madınho da turone d’Ural, gıdmitaklın hol zabno lo mbayno. Mawdıc’ste di egartho dcalu talabano mşadır meqım şabtho mi kongre li wazirutho di baroyutho d’Amerika.

U fusqonano kmifaşıq xıd funoyo me Amerika, cal d’Rusya dsıqwola ba 2017 dımhadado u mınyono da falohe ba izgadwotho nuxroye. Elo i mawdconuthathe d’Amerika’ste hiwo belhude kmo yawme bıthır mu hçomo du cyber-du nawlo dsim cal mşale Amerikoye u şırak privat uda mşale qutnuthoye thımlın Rusya dkıtyo bıthraye. Elo Kremlin’ste rfıdla a thomani da qutnuthoye d’Amerika.

Wu en dothe a izgadwothani dmısxori, gıdfaşla Amerika belhude i rişizgaduthayda b’Mosko bıgawe d’Ru’ya. Bu zabno di rişonutho d’Trump, qaşyo i m’watyutho beyn Amerika u Rusya. Ba 2018 fsıqwola Kremlın dmısxoro i izgadutho d’Amerika b’St Petersburg u mawfaqwola 60 ma falohe d’Amerika, xıd funoyo l’Woşington-dmawfaqwola mathlone Rusoye mi dacwa du semomo du goşuşo Rusoyo Serge Skripal b’Britania.