Merkel u Erdoğan drışlın a esore dı Turkiya camu Huyodo d’Urifi

U rişqutno d’Turkiya Recep Tayip Erdoğan sımle knuşyo bu video konferans cami rişathwazire d’Almanya Angela Merkel.

 Bu knuşyano drışlın anesore beyn da tre athrawotho wa esore dı Turkiya camu Huyodo d’Urifi.

Lfuth i maqırhonutho dhiwo di daira du kominikasyon di rişqutnutho dı Turkiya, athmıl bu knuşyo dsim calu darbo du video beyn di rişathwazire d’Almanya Merkel wu rişqutno Turkoyo Erdoğan drişo isbutho du teqwiyo da esore beyn da tre athrawotho wa esore beyn Turkiya wu Huyodo d’Urifi bu maşıqlo hatho. Bi maqırhonutho hawxa mir “Erdoğan mawdacle dkobıc dfotıh warqo hathto ba esore beyn Turkiya wu Huyodo d’Urifi.

Mqadamle a tawdiyothayde li rişathwazire d’Almanya Angela Merkel calu qdomo banoyo dhawila bi sbuthathe”. Maqrıhste, bi ytawtathe kıle calu knuşyo haroyo da rişone da athrawotho du Huyodo d’Urifi dsımwo ba yawmotho dşafıcina, Erdoğan mawdacle kmibıc dmitawfıq kriz ban esore beyn Turkiya wu Huyodo d’Urifi.

Mi şultonutho d’Almanya heş lo hiw maqırhonutho cali ytawtathe. Bu knuşyo da rişone du Huyodo d’Urifi, Almanya qadiro dkılyoqum tedbire qşetır dıkmibacwo dmitahıtwo cal Turkiya. Dilonoyo u Yawnan, Qufrus u Fransa ıbciwo dmihalıq dawsat qaşye mqabıl dı Turkiya.

Bi ytawto da rişone du Huyodo d’Urifi dathyowa lu hwoyo bi şabtho dşafıcina mıdwo fusqono dmitahıt tedbire darğo bdarğo cal Turkiya cala fulhone du ğaz dıksaymolın bu yamo heworo. U mmathlono celoyo da esore baroye du Huyodo d’Urifi Josep Borrell gıdımtayıb taşroro calu darbo dıgıdmihalıx cam Turkiya. Wu taşrorano gıdmimıd li ido bu knuşyo da rişone da athrawotho du Huyodo dıkmibıc dmisım bu yarho d’Odor.