Amerika mabdela esore stratejikoye cam Bahren

Amerika mabdela dialog stratejikoyo cam Bahren, leşan dmabdiyo u qyomo dbeynothaye u bebzabno, dsaymo u İran izola bu Madınho Mescoyo.

 İ ytawto dhawyo bu darbo du nawlo beyn du waziro di baroyutho d’Amerika Mike Pompeo u du baramnayde d’Bahren Dr.Cabdulatif bin Raşid al-Zayani, simo bıthır mıd Bahren wa İmarat mıttafqi dımcadli a esorathe cam İsroyel.

Athmıl u waziro di baroyutho d’Amerika Mike Pompeo hawile mamlo bu darbo du nawlo camu baramnayde d’Bahren Dr.Cabdulatif bin Raşid al-Zayani, leşan dmabdın u dialog stratejikoyo dbeyn da tıre athrawotho. İ ytawtatheste simo, bıthır mu dialog stratejikoyo dmabdewola Amerika cama İmarat Caraboye Mhayde meqım yarho.

Bahren wa İmarat maqbewolın dımcadli a esorathe cam İsroyel bi mescoyutho dsımwola Amerika wu qyomano mbayanwo bu ışmo u qyomo d’Abraham dıkmifaşıq u babo hem da Yudoye u hemste da Maşılmone. İ ytawto qamayto cam Bahren simoste, bu zabno d’Amerika kımnasyo dımqarwo İsroyel wa Caraboye lıhdode u bebzabno, dbınyo huyodo qawyo mqabıl du İran.

U dialogano mşarele athmıl beyn Amerika u Bahren, belhude 2 yawme bıthır mıd taşdarto rwıhto sımwola socurutho l’İsroyel leşan durşi i methcadronutho dbeynothaye bhaqle frişe. Athmılste, fayiro i tayosto mdinoyto qamayto d’İsroyel la İmarat Caraboye. A İmaratste mşadarwolın tayosto l’İsroyel 26 bu yarho dşafıcina. Afyoraniste simiwo cala thume uyaroye di Scudiye.

Bıthır ma dıroşe dhawın beyn Pompeo u Al Zayani, sim knuşyo lu tboco froso wu Pompeo mhanele i methcadronutho folhoyto dkito hani 70 eşne beyn da 2 athrawotho u mırle; İ nuqaztathe dkıtlan b’Bahren mşawşıto u fliğo l’qentrune frişe u bu şıkılano, qadırina dobina u ağunaydan mqabıl di marhıbonutho u dımamnina a sfinotho di tagorutho bu yamo du Xaliç mqabıl du gzomo du İran dkıtyo u qento rişoyo bu qlimano kule.

Al Zayaniste mkararle u mamlano d’Pompeo u mırle; İ hawrutho beyn Bahren u Amerika, arcutho li mşaynutho bu Xalic u lfuth i hzaytaydan, i methcadronuthathe kımdawmo dquwyo u dmişawşıto, elo kluqyo agzome du İran. U dialog stratejikoyo beyn Amerika u Bahren kmitahqıb me 5 sicotho di wazirutho di baroyutho d’Amerika u d’Bahren bnişo dmitaqwiyo i methcadronutho dbeynothaye.